嬰幼兒睡眠其實好有違常理

之前幾日同大家拆解咗幾個常見嘅睡眠誤解。

其實好多所謂嘅誤解，係建基於我哋自己嘅認知，覺得「應該係咁」

只不過，嬰幼兒睡眠好多時都同我哋嘅「理所當然」相反。

例如，好多人都覺得，想BB可以瞓過夜，唔會半夜起身食奶，畀佢遲啲瞓就得。我相信好多媽咪都曾經聽過陪月姨姨咁樣教。

初生BB本來就冇日夜之分，每隔2.5-3小時就要食奶，食完好快又要瞓過，所以都冇講話夜晚幾點要瞓個長覺嘅（都要分㗎其實，但唔係以睡眠時數為準，係以周邊環境狀況區別，呢度又涉及另一個睡眠誤解）。

之但係，當踏出初生嬰兒期，如果繼續用返處理初生BB嘅方式，由得BB夜瞓，積落嘅睡眠債，遲早都要還 -- 突然夜醒頻頻，開始要食返夜奶等等。

伸延閱讀：《4個月睡眠倒退期》

去到BB 6-9個月大，其實已經有可能連續瞓到11-12個鐘唔駛食奶。但由於習慣夜瞓嘅關係，令BB根本冇機會可以瞓到咁耐，久而久之大家就覺得佢朝早6點起身，食餐奶跟住再瞓到10點11點係正常嘅事... 其實咁做對BB嘅睡眠質素有好大影響

講遠咗... Anyway，我想講嘅係，我哋嘅認知，會加入咗好多主觀因素以及家長嘅習慣，但嬰幼兒睡眠其實係最自然嘅事，並非我哋可以咁容易控制得到。

所以，想囝囝囡囡瞓得好，我哋必須要遵循睡眠嘅自然規律，第一步就係睇吓資料，去瞭解囝囝囡囡嘅睡眠需要，將睡眠放喺高啲嘅位置，甚至放喺第一位。

呢個就係我開Dolce Sleepers專頁嘅原因，因為香港似乎極少人會提到「睡眠需要」呢個概念，兒科醫生答你大個啲就會好，就連衛生署網站都淨係教人點做睡眠訓練，但就完全唔提入睡時間嘅重要性...

請幫幫忙share呢篇文章，令多啲人認識到嬰幼兒健康睡眠嘅重要性啦！