安撫神器真的能幫助入睡嗎?

好多BB都會有成日大喊唔停，難以入睡嘅問題。

全日抱住氹BB瞓覺，更加係好多媽咪爹哋嘅惡夢

於是，有需求自然有供應，好多商人都會諗啲產品出嚟，協助新手父母解決育兒難題。

其中一種就係一隻海馬型嘅公仔。

先睇睇產品介紹（取自某網上商店）

「 聲光安撫海馬發出柔和舒適的燈光、模擬在媽媽肚子內聽到的海浪聲，更有多達8首的搖籃曲，增加寶寶睡眠的安全感。音樂將近播放完畢時，燈光更會漸漸變暗。就算寶寶在半夜中醒來，寶寶只需要輕抱海馬，海馬便會再隨即播放音樂。」

大家記得營造安全舒適睡環境嘅幾個主要條件嗎？

1) 黑暗

2) 安靜

3) 溫度適中

4) 冇軟身物品

問題1：隻海馬公仔有燈，得唔得呢？

答：初生BB出世時，仍然保有母體褪黑激素呢種睡眠荷爾蒙，所以就算好光嘅環境都一樣瞓得到，瞓得好。

但去到6-8周，母體褪黑激素已經冇乜得淨，BB就會需要自己分泌褪黑激素，至能夠產生足夠睡意。

因為光線會抑制睡眠荷爾蒙嘅分泌，所以一般建議睡眠環境要黑暗，至能夠較輕易令BB順利入睡。

而且黑暗嘅環境亦能減低BB受刺激嘅程度，同埋令小朋友冇咁易掛住玩唔願瞓。

所以，呢隻海馬嘅燈光，對初生BB嚟講，從生理上而言或者影響不大。加上冇咗由好光變好黑嘅突然轉變，BB或者亦冇咁易會因為睇唔到嘢而嚇親大喊。但仍然有可能令BB覺得好玩，一直睇住隻公仔瞓唔到。

問題2：海浪聲同搖籃曲，又好唔好？

答：當BB仍然喺媽咪肚入面嘅時候，其實個環境好多聲音，有心跳聲有血液流動嘅聲音。所以，一個完全安靜嘅環境，BB可能會唔適應。我哋一般建議用白噪音，可以營造返媽咪肚入面嘅環境，同遮蓋突如其來嘅環境噪音。通常我哋都唔會建議用音樂，亦唔會用大自然嘅聲音（例如海浪聲），因為呢啲聲音有高低起伏，有開始有停止，所以對BB大腦都會有一定嘅刺激。

所以，呢隻海馬會轉歌，亦會自動停止，其實究竟對BB係安撫定刺激好難講。而且，如果BB瞓著時有音樂，半夜醒時冇咗可能會喊（除非次次都識得自己㩒返著）。

問題3：BB有隻公仔攬住，係咪會有安全感啲？

BB未識講嘢，公仔係咪畀到安全感佢，我哋唔會能夠肯定，但就可以肯定唔係最「安全」嘅睡眠安排。美國兒科醫學會嘅安全睡眠指引係，BB嘅睡床應該空無一物，尤其是軟身物品，包括枕頭、被、攬枕、公仔，床圍等，目的係避免BB塊面被蓋住透唔到氣，或者BB將塊面貼住呢啲物品，吸返自己呼出嘅二氧化碳而中毒。

結論：呢隻海馬公仔，係咪能夠起到安撫作用，定係會刺激到BB，其實好難預計得到。而且，BB對隻公仔有冇興趣，其實都好難講。所以，呢啲gadget都係冇乜需要嘅。唔好諗住買隻公仔，BB就能夠瞓得好。

初生BB能支撐嘅清醒時間只有45-60分鐘，未有畀BB足夠嘅休息，佢攰得滯時唔好話隻公仔，連媽咪抱住都一樣會扭嚟扭去大喊。呢個時候，要做嘅係減少刺激，一隻又會發光又會發聲嘅公仔，好可能會幫倒忙呀！