被餵奶時間主導BB作息，係導致睡眠問題嘅最大兇手

唔好限住3／4小時餵一次奶

唔好限住3／4小時餵一次奶

唔好限住3／4小時餵一次奶

好重要，但講3次都唔夠！

點樣至可以推翻呢個觀念，令多啲媽咪爹哋明白到：

被餵奶時間主導BB作息，係導致睡眠問題嘅最大兇手！

早排出過個post，好多媽咪都答其實醫院都唔係教限死幾耐餵一次奶！

但我差唔多每個星期，喺群組／專頁PM／其他媽媽谷，都見到因為行3／4小時「食玩瞓」循環，但BB根本唔會瞓得咁穩定，攪到唔知點安排瞓覺同餵奶時間，同埋BB成日超攰爆喊都瞓唔到嘅問題。

食玩瞓呢個模式，本身唔係問題，我喺0-5個月健康睡眠工作坊都有講解呢個做法，但有一句好多人都忽略咗嘅就係：

「嘗試去做就好，唔可能日日都可以跟到，今日唔得，聽日再嚟過囉！」

準時入睡重要過準時餵奶，早或遲30分鐘餵奶唔係問題，亦唔建議將「每4個鐘餵一次奶」視為里程碑或法規。日頭餵多啲夜晚就食少啲，早啲可以停夜奶。

順便講埋，我亦非常唔建議開始加固後急住用粥仔代一餐奶。

加固目的，係畀BB慢慢接受其他味道同質感，唔應該追求塞飽BB（其實奶比粥更捱得耐），亦唔需要驚BB加固食得少而唔夠營養（頭一年蛋白質最重要，奶比粥營養高好多）。

所以，啱啱開始加固，其實喺兩餐奶之間餵幾啖粥就足夠，避免BB嘅生活常規有突然轉變（尤其腸胃方面），亦能避免BB因為日頭食得唔夠，攪到半夜肚餓要食返夜奶。

我之前都寫過幾篇餵奶加固與睡眠嘅相關文章，歡迎click嚟睇返。

#繼續挑戰香港育兒方式

唔想錯過正向睡眠及教養文章分享，立即加入whatsapp群組啦！