BB驚咗瞓覺，可以點做呢？

[一開始哄睡，BB就開始喊，好驚咁...]

好多時都有媽咪問我點處理BB驚瞓覺嘅問題，我都會反問：

「你點知道BB好驚呢？ 」

BB未識講嘢，要表達自己，好多時都只能夠「喊」

睇開Dolce Sleepers嘅話，都知道我成日話：

BB喊都有唔同喊法，去表達唔同嘅意思！

而我哋大人，其實好多時都會解讀過度，將我哋自己嘅諗法同感受，project咗去BB身上...

BB喊，大人唔識點處理，會有不安同驚嘅感覺，但自己未必會意識到，於是就將呢個感覺套咗落BB身上，認為BB係驚咗瞓覺...

同樣，有媽咪亦會話BB「唔鍾意」瞓覺。

其實真係BB唔鍾意瞓覺，定係大人唔鍾意氹BB瞓覺呢？（尤其是次次想佢瞓都喊嘅時候）

講返「驚瞓覺」呢個問題...

BB唔會怕黑

因為未出世前，BB喺媽咪個肚入面時就係黑蚊蚊嘅，佢喺呢個環境渡過咗9個月，點會仲驚呢？反而應該會更安心囉，係咪先？

咁有乜嘢有可能令BB感到不安呢？

係「突如其來嘅轉變」

好多BB都會對轉變有反應，越敏感嘅BB反應越大（但有時會需要幾秒至幾十秒嘅反應時間）

原本喺廳玩到興高采烈，突然被抱起冇得玩，然後帶入一個黑蚊蚊嘅地方，仲要可能未必知嗰個係瞓覺嘅地方，淨係覺得係一個陌生嘅環境

根據 RIE育兒法 創辦人Magda Gerber嘅觀察，當BB能夠預測到所將發生嘅事，至能夠安心，亦會更合作。

所以，當由好光突然變到好黑，呢個轉變，就會trigger到BB大喊。

之所以點解好多媽咪話抱返BB出去，有光就唔喊，就係因為你帶佢去返佢之前習慣咗嘅環境，所以咪唔喊囉！

「但我已經係喺有光嘅地方氹佢瞓，但都係喊喎？」

咁就要睇吓，除咗有冇突如其來嘅轉變外，BB會唔會係因為其他原因而喊，例如：

玩時大腦受好大刺激，停止刺激後一時適應唔到

大人嘅哄睡動作太刺激，或轉變得太快（左手轉右手，打橫變打直，又搖又拍...）

錯過咗理想入睡時間，BB已經攰得滯，冇得玩至開始feel到自己攰，但又瞓唔著（係呀，攰得滯反而會瞓唔著！）

大人自己可能內心好抗拒氹BB瞓覺呢件事（shark music），從身體語言或面部表情透露咗出嚟（miscue），令BB覺得不安［安全圈養育］

咁即係可以點做呢？點樣可以令BB唔會一要瞓覺就喊呢？

首先就係要移除令BB不安，或者瞓唔到嘅各項安睡因素，包括環境、生理、心理各方面。

包括：

1. 同BB預告即將會發生嘅事，同埋

2. 預返多啲時間畀BB去慢慢適應轉變，加上

3. 要識得點樣掌握好幾時畀BB瞓覺嘅時間

仲有非常非常重要嘅係：

4. 大人自己嘅心態：

千祈唔好見BB「驚」就連大人都驚埋一份，即係起勢又拍又搖，又不斷轉換安撫方式等，因為咁做反而會令BB更不安。

Sportscasting喺呢個情況最啱用，加上大人冷靜處變不驚嘅狀態，用being with嘅心態，用冷靜去感染BB，同佢co-regulate...