BB瞓得好，大人BB都受益！我撐你㗎！

為一打二嘅孖仔媽媽，喺冇四大長老同工人姐姐嘅情況下，仲能夠攪到Dolce Sleepers呢壇嘢，絕對係因為孖仔自細都瞓得好之故（同埋幸運地好早就遇到RIE育兒法）！

同Cathy媽媽嘅囡囡一樣，孖仔亦冇出現所謂嘅terrible two。

我甚至係喺孖仔2歲時，因為得閒得滯，所以至走去讀咗個嬰幼兒睡眠顧問課程（2018年送畀自己嘅生日禮物），然後開咗呢個專門講解BB睡眠嘅page。

或者有啲人會話，係我好彩孖仔易湊嗟...

但其實佢哋3歲停止午睡時瞓得好差，晚晚半夜起身開party，日頭又唔願瞓晏覺，於是慢慢開始變身成horrible 3，我自己都近乎每日發癲。

仲洗咗好多錢，周圍搵外國嘅資深睡眠顧問救命...

最後終於發現到調整重點，至好快攪掂穩定返，孖仔同我嘅心情都即刻靚返好多。

所以我更加肯定：

瞓得好唔好，對大人同BB情緒都有直接影響！

近兩年睇好多外國育兒專家嘅講座，例如Dr. Tina Payne Bryson同Dr Mona Delahooke，佢哋都異口同聲表示，睡眠充足係最最最重要嘅一點。

瞓得夠瞓得好嘅小朋友，心情靚啲亦flexible啲，冇咁容易情緒爆發。

仲有就係，瞓得好胃口亦都好啲，同埋願意嘗試新事物。

想小朋友有時可以自己玩／瞓，唔駛成日痴住大人要人陪玩／睡？都係需要佢瞓得好唔係成日好攰咁，佢至願意畀你行開長啲時間，都能夠安心自己玩／瞓覺囉！

再講，好多研究亦指出，擁有充足睡眠，唔單止抵抗力好啲，連記憶同學習能力都會高啲㗎！

所以，如果你成日被身邊嘅人話你太緊張，又或者質疑你，問點解瞓覺都要攪咁多嘢...

我撐你呀！

Share埋Cathy媽媽嘅分享：

「我身邊啲人(包括屋企人)都一樣覺得我過份緊張！ 但就好似Catherine所講，瞓得好瞓得夠受益係我同BB！

我咧，就基本每日至少有5個鐘me time，可以做自己嘢。觀察我囡囡，佢依家越來越大個，每日都心情靚靚，學嘢又叻又專注。

之前好驚Terrible two，但依家佢已經兩歲啦，除咗有自己主見之外，其實完全冇所有嘅難搞，基本上每日都好合作，好好湊！

我每日基本都算係比較輕鬆，去街都算少扭計！而且生長線一直都好好，食得瞓得，養到好似隻(豬)仔咁。

呢啲就係健康睡眠帶來嘅好處！搞到我呢個媽媽都堅持每日作息都好定時！」

*以上係Cathy媽媽喺睡眠調整全面睇學員專屬群組嘅分享，我好希望可以建立到一個community，聚集同樣重視健康睡眠嘅媽咪爹哋，互相支持鼓勵，同埋分享調整經驗同心得。

借呢個機會，多謝各位曾經喺群組分享嘅媽咪爹哋，多謝你哋同我一齊推廣健康睡眠呀！希望幫到多啲家庭能夠有覺好瞓，親子關係更融洽。

仲有就係：湊得開心愉快輕鬆啲

你都想好似Cathy媽媽咁？Click去睇睇啦

*網上圖片，非Cathy媽媽嚟