嬰幼兒睡眠其實好有違常理
坊間一直流傳好多令BB瞓得 「好」嘅方法...
之所以括住個「好」字，因為好多人只會覺得，快啲令BB戒到夜奶，大人可以唔駛半夜起身湊B就已經叫做瞓得好...
於是，好多人都諗住，想BB可以瞓過夜，唔會半夜起身食奶，畀佢遲啲瞓就得。
「半夜12點瞓到第二朝6點，掂啦！ 」
我相信好多媽咪都曾經聽過陪月姨姨咁樣教...
係，對大人嚟講，連續瞓到6個鐘的確算係咁。
對初生BB嚟講，連續6個鐘唔駛食奶，似乎亦好理想...
其實，初生BB本來就冇日夜之分，每隔2.5-3小時就要食奶，食完好快又要瞓過，所以都冇講話夜晚幾點要瞓個長覺嘅（都要分㗎其實，但唔係以睡眠時數為準，係以周邊環境狀況區別，呢度又涉及另一個睡眠誤解）。
之但係，當踏出初生嬰兒期（a.k.a. 4個月睡眠倒退期），如果繼續用返處理初生BB嘅方式，由得BB夜瞓，積落嘅睡眠債，遲早都要還 -- 突然夜醒頻頻，開始要食返夜奶等等。
其實，好多BB去到6-9個月大，生理上已經可以連續瞓到11-12個鐘唔駛食奶。
但由於習慣夜瞓嘅關係，令BB根本冇機會可以瞓到咁耐，久而久之大家就覺得，BB朝早5/6點起身（早醒），食餐奶跟住再瞓到10點11點係正常嘅事...
其實咁做，BB嘅睡眠質素並唔好，絕對唔係健康嘅睡眠習慣，對BB嘅身體及大腦發育都會有負面影響。
而媽咪每朝都要5/6點起身餵奶，講緊唔止係幾個月，可能係1年2年嘅事。就算可以瞓得返 ，都好辛苦呀！
而且仲要日日湊到半夜，冇得抖冇晒me time，開頭或者覺得係要犧牲。但久而久之，壓力越嚟越大，又預料唔到情況幾時會有好轉（更慘嘅係一時好一時差，不斷喺希望同失望之間反覆糾纏…），對情緒以至親子關係都會造成負面影響…
好多坊間流傳呢啲令BB瞓得「好」嘅方法，都只係頭痛醫頭，腳痛醫腳，係好短視嘅做法。
呢啲做法一般只係建基於我哋自己嘅認知，覺得「應該係咁」。
但事實係，嬰幼兒睡眠好多時都同我哋嘅「理所當然」相反。
嬰幼兒睡眠其實係最自然嘅事，但當加入咗好多主觀因素以及習慣，就會導致惡性循環，令BB瞓得越嚟越差...
所以，想BB瞓得好（講緊健康睡眠，即刻足夠時數+良好睡眠質素），我哋必須要遵循睡眠嘅自然規律。
第一步就係睇吓資料，去瞭解BB嘅睡眠需要，將睡眠放喺高啲嘅位置。
呢個就係我喺2019年開Dolce Sleepers專頁嘅原因（當時完全冇人講嬰幼兒睡眠㗎！）
香港極少人會提到「睡眠需要」呢個概念，兒科醫生答你大個啲就會好，就連衛生署網站都淨係教人點做睡眠訓練，但就完全唔提入睡時間，同埋瞭解BB睡眠需要嘅重要性...
如果你希望唔駛再日日望天打卦，希望可以湊得輕鬆啲，BB又瞓得健康啲開心啲，歡迎隨時搵我傾傾。
我亦有唔同嘅工作坊／講座／課程可以幫到你㗎！
