當同媽咪爹哋傾BB嘅睡眠情況時，我會好注重佢哋描述狀況時所用嘅字眼...

當同媽咪爹哋傾BB嘅睡眠情況時，我會好注重佢哋描述狀況時所用嘅字眼...

1）「點解有時BB識得自己瞓，有時借唔識？」

2）「點解BB唔肯瞓覺？」

3）「放BB落床氹佢瞓，但會大喊到拗晒腰...」

上面用嘅字：「唔識瞓」「唔肯瞓」「氹佢瞓」

其實都反映咗大人的心態，亦係造成睡眠問題嘅原因。

1）BB唔會一時「識」瞓，一時「唔識」瞓。BB其實有能力自己瞓，但未必每次都做得到，咁係因為當有一啲外在因素阻礙，BB至會無辦法瞓得到。淨係諗住點令BB「識」瞓覺，就會忽略咗真正嘅問題所在。

2）同樣，BB唔係「唔肯瞓」，只係瞓唔到，原因同上。睡眠係一種生理需要，BB會刻意唔畀自己瞓覺，折磨自己。

3）BB其實唔係一定要人氹至可以瞓得到。好多時甚至係因為畀大人迫佢瞓攪到大喊。如果BB喺床上面好地地喺度玩，但畀大人㩒實唔准郁，patpat不斷被拍打，梗係會掙扎大喊，同拗晒腰抗議呀！

我成日都講 —— 瞓覺冇得迫。

嘗試唔好去諗點解BB／小朋友咁曳唔合作，而係諗有啲乜嘢障礙，令到佢瞓唔到。

當你自己心態上轉變咗，你睇成件事嘅態度都會唔同咗。

你會有多啲耐性，起碼冇咁容易爆炸先，你嘅回應方式亦會唔同咗，可能反而冇咁易刺激到BB，減低掙扎。

跟住你就會諗有啲咩可以去調整，有啲咩改變可以去做

咁實際上有啲咩調整可以去做呢？

睇呢幾篇文章啦：點令BB肯瞓覺？其實你問錯咗問題！

記住，必須先係你自己作出改變，先至會見到BB／小朋友出現轉變㗎！