BB成日瞓覺時喊，氹極都瞓唔到，其實只需要改變一個做法

好多照顧初生嬰兒嘅資訊都會提到「食玩瞓」循環。

咁究竟係咩意思呢？

意思係將BB嘅生活作息分成三個部分：食奶、玩耍、訓覺，然後不斷重複呢個模式。

外國嘅育兒資訊都有類似建議，叫做EASY，eat／awake／sleep／you time。

■ 食玩瞓循環嘅好處

「食玩瞓」循環嘅最大好處，係可以令BB嘅作息有規律，咁照顧者安排活動同餵奶時間可以方便啲。

仲有，呢個方法可以避免BB食完奶就瞓著，形成 奶睡 呢個有啲人覺得會影響睡眠質素嘅「壞」習慣（有關呢點，有機會再講）。

不過，「食玩瞓」循環係咪真係行得通呢？

■ 食玩瞓循環嘅問題

其實初生BB體力低，加上受到母體睡眠荷爾蒙嘅影響，BB好容易係食奶嘅時候瞓著，呢個係好常見嘅情況，無需太擔心。

再加上，初生BB嘅小睡情況未穩定，可能由20分鐘到2個鐘唔等，呢個都係正常嘅事。

所以，「食玩瞓」循環其實只係幫你固定咗餵奶嘅時間，但從睡眠角度去睇，係好難真係做到嘅。

甚至有時會因為被餵奶時間控制睡眠時間，搞到BB過度疲勞而想瞓都瞓唔著...

當BB覺得攰嘅時候，食奶時嘅吸啜動作會令佢放鬆，咁就好容易瞓著。

所以如果你想用「食玩瞓」循環嚟避免BB食完奶即刻瞓著，唔一定會成功。

仲有，如果BB嘅小睡長度不如預期，循環被打亂，照顧者就可能會手忙腳亂，覺得自己做得唔好。

甚至開始有好大壓力，覺得好似BB有問題，又或者覺得自己唔識照顧BB。

呢啲想法對你同BB都無好處，對於產後媽媽嘅情緒仲會有負面影響，甚至會影響到屋企氣氛，令夫妻關係同親子關係出現問題。

所以，「食玩瞓」呢個好多人一直視為育兒法則嘅做法，其實係一個好難達到嘅目標。

從睡眠角度去睇，「食玩瞓」唯一嘅好處就係提醒你，BB真係需要瞓好多覺！

■ 衝破食玩瞓循環嘅枷鎖

如果你一直因為做唔到「食玩瞓」循環而覺得有好大壓力，放鬆啲，呢個唔係你或者BB嘅問題。

你無需執著於BB小睡嘅長短，只要每日嘅總睡眠時間夠就得。

初生BB嘅作息需要靈活應對，最緊要係觀察同了解BB嘅需要，再配合相關知識，搵出最適合你BB嘅作息安排。

唔好俾時鐘或者數字束縛自己，試下享受當下，感受同回應BB嘅需要。咁樣你同BB都會感到更加輕鬆，更加親密。

■ 重點：

- 初生BB食奶後瞓著係好常見嘅事，唔使特登叫醒佢

- 0-5個月BB嘅小睡長度唔穩定係正常嘅事

- 「食玩瞓」循環可以作為參考，但無需勉強執行

■ 案例分享

Wing媽媽就係其中一位被教導要跟住食玩瞓循環，限住4小時至餵BB食奶嘅媽媽。

初頭佢都好擔心，怕BB唔適應新嘅做法。

不過，只係幾日，佢就已經回報情況，話BB瞓得好咗，心情亦靚咗！

Wing媽媽：

「Bb 4m13d

嘗試改變食玩訓模式2-3日

好明顯Bb訓覺好左

起碼訓覺時無喊住訓

亦feel到佢心情好左 清醒時間都比以前長左

之前短得好過分大部分時間得1個鐘清醒

雖然而家大部分情況都仲係短小睡

但我知呢個情況會隨住佢成長而愈來愈好的！

多謝你

最近呢1 2日又幫佢戒包巾

暫時拆抽 拎晒2隻手出黎訓都訓到成晚

成晚中間只係比左2，3次奶嘴

好快就訓得返

尚算順利喜出望外」