BB半夜每隔2-3個鐘會發出一啲聲音，但又無開眼，我地會觀察一下，有時會自己瞓得返，有時要拍吓，但我地2個就瞓唔到連續3個鐘... 🫠

有媽媽問：「BB半夜每隔2-3個鐘會發出一啲聲音，甚至搖頭，但又無開眼，有時係因為甩奶咀，我地會觀察一下，有時隔幾分鐘佢會瞓得返，但有時我地驚佢會整醒自己所以會輕輕拍拍佢，佢會靜返，咁其實算唔算瞓得到？但我地2個就瞓唔到連續3個鐘... 」

我哋對於「夜醒」嘅定義，係大人需要協助BB瞓返，導致大人自己冇覺好瞓。

所以你而家面對嘅情況，係需要處理

先講解少少基本睡眠科學：

BB嘅睡眠週期較短，夜晚一般係2小時左右一個週期，簡單嚟講包括深層及淺層睡眠階段。

BB喺淺層睡眠時，可能會發出聲音、搖頭、甚至翻身，呢啲都係正常嘅現象。

大部分時間BB並唔係真正醒咗，而係進入咗淺眠狀態，佢哋好多時都會自己再進入深層睡眠。

所以喺未確定BB已完全清醒嘅情況下，建議家長等一等先，睇下BB會唔會自己瞓返，而唔使即時干預。

咁做亦係畀緊機會BB練習自行連接睡眠周期，唔想BB嚟緊幾年都仍然晚晚夜醒大喊，正確回應夜醒非常重要。

呢度其實亦涉及大人自己嘅心態：

我相信大人要明白，幾時BB需要我哋嘅幫助，幾時我哋要放手。

其實唔止睡眠，喺育兒過程中，學識「放手」係好重要嘅一環。

作為父母，我哋當然想BB開心、安全，避免一切唔安穩嘅情況。

但適量嘅掙扎其實係成長中嘅必經之路。

例如，BB學行或者學用餐具時，佢哋需要試幾次、跌倒幾次，先至可以掌握到技巧。

如果因為見BB未能夠自己食到，就一直餵落去；或者怕BB跌親就一直扶住唔放手，其實只係阻礙住BB嘅發展，令佢唔能夠相信自己嘅能力，習慣依賴其他人去幫佢解決問題。

同樣，當BB喺夜晚輕微翻動或發出聲音時，如果每次都立即去安撫，反而可能影響佢學習自主入睡嘅能力。

呢啲小小嘅挑戰，有助佢慢慢適應，發展出安撫自己入睡嘅技巧，從而培養更穩定嘅睡眠習慣。

當BB能夠自己度過一啲困難，佢會開始建立自信心，知道即使冇大人喺旁邊，佢都可以應付唔同嘅情況。

呢個「放手」嘅過程係逐步進行嘅，唔係要即刻放開，而係適時退一步，畀BB有空間去探索自己嘅能力。

容許小掙扎，不單係睡眠，日常生活中好多場景都可以應用到。

所以，我哋要學識去分辨幾時真係需要幫手，幾時應該比BB自己試下，喺適當嘅時候放手，讓佢哋有空間成長

想知道點樣妥善回應BB夜醒，培養良好睡眠習慣，我有以下兩個課程幫到你：

【嬰兒自然入睡法】0-5個月BB

【睡眠調整全面睇】6個月以上

歡迎填寫睡眠問卷，我會畀啲初步建議你