小朋友怕黑怕怪獸，唔肯瞓覺點算好？

孖仔爸爸好鍾意睇恐怖片，亦好清楚孖仔怕聽「恐怖」故事，於是佢講故事時周不時會有怪獸出場

孖仔細個時會驚到大叫，但而家大個咗，會好認真咁同孖仔爸爸講：

「呢個世界冇怪獸㗎！」

然後，夜晚要入房準備瞓覺前，孖仔要開晒所有房嘅燈，因為「驚有怪獸」。

喂呀！咁即係有定冇怪獸呢？

點解會咁矛盾呢？

以前我都唔明，但最近終於諗到原因嘞！

其實，孖仔係知道「怪獸」呢種生物並不存在（至少唔係故事書入面嗰種）。

但喺黑暗環境，佢哋會感到不安

因為唔知點樣形容呢種不安感，於是就用「怪獸」作為代號。

又其實，驚「黑暗中嘅怪獸」好正常呀！

就算係大人，喺一個黑蚊蚊嘅地方，都會有不安感，會提高警覺性啦～

所以，知道呢個世界冇怪獸，同怕黑驚有怪獸，其實並冇矛盾。

明白到呢點，就知道點解嘗試同小朋友解釋「怪獸並不存在」係幾咁嘥氣嘅事。

無論點講，小朋友其實都唔會安心唔再驚。

因為佢哋感覺到嘅不安感係好真實地存在㗎！

咁點樣至能夠令小朋友唔再驚呢？

你問錯問題嘞～

驚唔驚唔係由我哋大人話事，亦唔可能做啲乜嘢去「刪除」小朋友怕黑嘅心情。

我哋可以做嘅，係畀小朋友知道，我哋明白佢嘅不安。

畀小朋友知道，我哋會確保佢嘅安全，唔會要佢一個人去面對不安。

我同孖仔A關於點樣對付怪獸嘅對話：睇呢度

#怕黑其實係好事

#幫到小朋友學習提高警覺性

#小心行事