一上車即斷電，其實係一個警告訊號
見到某育兒分享平台出咗張相，話媽咪一打二帶小朋友去街，#上車即斷電。
見到非常多留言表示身同感受，亦爆晒like...
個個小朋友都係咁，係咪即係正常？
其實，呢個情況證明香港嘅小朋友普遍睡眠不足，所以上車搖搖吓就會好舒服咁瞓咗...
所以，如果上車唔會瞓著叫唔正常，咁我寧願孖仔唔正常，但健康。
因為我哋去car trip就算坐2-3個鐘車，除係非特登安排喺午睡時間出發，否則佢哋從來唔會瞓著。
因為佢哋瞓得足夠，冇欠落睡眠債。
上星期六晚（凌晨3點，定應該係星期日呢？），我漏夜起身幫一個機構開咗場講座。
對象係2.5歲以上，已經返緊學嘅小朋友。
有非常多家長表示，小朋友夜晚唔願瞓，朝早又唔願起身...
加上 #一上車就瞓著覺 呢個徵狀，明顯係長期睡眠不足
尤其是活力爆棚但專注力低，好似成日唔駛瞓覺嘅小朋友，其實並非佢哋睡眠需要特別低，而係其實 #長期只叉到7成電，所以大腦一直泵住壓力荷爾蒙去支撐住，令小朋友全日處於精神亢奮嘅狀態。
有研究指出，小朋友成日走嚟走去冇時停，專注力不足，好似有 #過度活躍症 嘅跡象咁，好可能係因為長期睡眠不足所致。
當小朋友嘅睡眠質素得到改善，唔單止減輕咗ADHD嘅徵狀，而且情緒亦會好好多，少好多反抗行為，學習能力及記憶力亦會上升。
除此之外，當小朋友嘅夜間睡眠能夠配合到生理時鐘，睡眠修護效果會好好多，對身體發育，以及 #免疫能力都有好大幫助。
所以，我好想好想令多啲媽咪爹哋知道，其實小朋友 #上車即斷電係一個警告訊號。
呢個情況，唔應該去習慣
只要調整返好作息時間，同埋令小朋友唔抗拒瞓覺，其實係絕對可以避免，唔駛攪到自己咁辛苦，手忙腳亂，彷徨緊張㗎！
