聖誕臨近，開心定擔心？

又到聖誕~又到聖誕~~

你安排咗幾多節目呢？我哋淨係得家庭聚餐 x2，冇任何其他活動，好悶呀

喺香港應該就唔同嘞，淨係帶小朋友出街睇聖誕燈飾同影相，都已經可以好忙...

咁多燈咁多五顏六色嘅裝飾，對BB嚟講新奇又刺激，但到底會睇得好開心，定係可能會刺激得滯，就好難講嘞

希望大人同BB都能夠歡渡聖誕，可以參考一下，RIE育兒法 資深導師Janet Lansbury畀大家嘅建議：

1. 唔好畀自己太大壓力

聖誕節可能會有好多應酬，全部出席嘅話，唔好話BB，對大人嚟講都係一件好攰嘅事... 點好呢？試想像你有2個籃，一個係裝「我應該要做嘅事」，另一個就裝「我想做嘅事」，知道幾時要設限，喺照顧自己身心上係好重要嘅一步。

2. 計劃活動時要考慮到囝囝囡囡嘅作息時間

喺決定係唔係要出席一個活動時，你可以問自己：「我BB喺呢個情況下，能夠頂得住嗎？能夠保持愉快嗎？」

3. 諗定退路

明知活動會攪到好夜，或對BB嚟講太太刺激嘅話，就要做定可能要早走嘅心理準備。

4. 為BB做好準備

話定畀佢哋知，即將會發生嘅事，越詳細越好。

5. 避免令小朋友太期待太興奮

期待可以係一件開心嘅事，但對小朋友嚟講，可能會令情緒過分強烈。

6. 留心注意小朋友失控前跡象

一旦開始出現異常行為，就算係幾微細都好，最好都帶小朋友離開/暫時遠離，唔好等到情況失控至處理。

7. 為全家人預留安靜時間，甚至一齊午睡

大人同BB都需要放空嘅時間㗎！

8. 唔好為咗要留下美好回憶，反而令大人或BB感受到壓力

好好享受節日時一家人喺埋一齊嘅時刻，隨遇而安，可能反而有更多驚喜！

預祝 你同家人有一個溫馨愉快同甜蜜嘅節日

☆☆☆

嬰幼兒睡眠顧問 Catherine

全港首位本地嬰幼兒睡眠顧問 ‧ RIE育兒法專業課程畢業生 ‧ 孖仔媽媽

網上課程 / 電話諮詢 / 免費資源分享