朝早應該叫醒BB嗎？
仲爭3分鐘就到9am，孖仔仲瞓緊覺。而我，掙扎緊係咪要叫醒佢哋
呢個係經常有媽咪問嘅問題：BB琴日夜咗瞓，半夜又有醒，見佢終極瞓得咁冧，係咪應該由得佢繼續瞓，補返時數呢？
我會好肯定咁答，最多畀佢瞓多15分鐘就要叫醒。如果已轉1覺，都最多30分鐘就好。
原因係，如果朝早遲咗起身，就好有機會影響到小睡，令BB唔能夠依時瞓得著，於是全日嘅作息時間就會亂晒，令夜晚再次瞓得唔好，造成惡性循環（註：nap 1時間必須固定，係 #穩定作息時間5大守則 嘅第2條，youtube有片睇㗎 ）
所以，無論之前嗰晚BB瞓成點都好，每日都要係一個restart，跟返你所制定嘅時間表畀BB瞓，夠鐘就要叫醒佢，咁至能夠穩定到作息時間，令你能夠順利掌握好夜晚開始哄睡或放床時間，避免因為疲勞過度或疲勞不足而瞓唔著，同埋夜醒早醒。
如果你有計劃想戒抱睡奶睡，一個穩定嘅作息時間表尤其重要，否則你冇計好時間就咁放BB落床，掙扎一定會大好多，你就好容易會放棄抱返BB。
就算BB真係自己瞓到，甚至已經習慣自行入睡，但因為入睡時間唔理想，令睡眠質素唔好，半夜醒咗都一樣會爆喊自己瞓唔返㗎！
好嘞，講返孖仔...
點解講完上面一堆道理，我自己都仍然會有呢個掙扎呢？因為：
孖仔已經5.5歲，冇瞓晏覺好耐
之前去旅行，連續好多晚都唔夠瞓
仲放緊暑假，有3個星期至開學，仲有時間去調整返
夜晚要熄燈上床，佢哋未瞓得著都唔會抗拒，自己傾計同玩到瞓著，唔駛我陪唔駛我理
打完篇文，而家已經係9:10am。都係去叫醒佢哋好啲，費事今晚11點都未瞓得著
