想BB瞓得好，係咪就冇得再出夜街呢？

我知道有好多媽咪爹哋，喺跟建議清醒時間畀BB早啲瞓覺後，夜醒問題就已經得到明顯改善。

但係，咁係咪即係從此冇得再出夜街呢？

當然唔係啦！

成為父母後，生活難免會出現翻天覆地嘅改變。

但我相信，我哋需要嘅係compromise，而唔係sacrifice

任何一段關係，如果有一方抱住犧牲自己嘅心態，都唔會健康，甚至令關係變得脆弱...

所以，能夠從雙方嘅需要之間取得平衡，係最重要嘅一個心態轉變。

從睡眠上嚟講，BB同小朋友都需要穩定嘅作息時間，無論係星期一至五，定星期六日，作息時間都盡量唔好太飄忽。

注意我講嘅係盡量。

如果BB平時瞓得好，儲埋有盈餘，咁間唔時出街，瞓少咗或者夜瞓咗，都未必會有好大問題。

只要識得點樣處理突發情況，就算睡眠質素受到影響，都只會係短期性，好快就能夠重回軌道。

當然，如果個個星期都出夜街，BB啱啱瞓得好返又再出街，睡眠債越積越多，都會出事㗎

尤其是月齡比較細嘅BB，你帶佢出夜街，其實佢都未必會enjoy。

當BB覺得攰，同埋受刺激過度嘅話，仲可能會扭計爆喊，掃晒興...

係咪真係值得呢？係咪真係需要呢？

一或係，畀BB喺屋企瞓覺，請長輩或工人姐姐睇住，媽咪爹哋就可以出去二人世界，或者約吓朋友，更加輕鬆自在呢？

呢個時候，更加見得健康睡眠嘅重要性！

BB一向瞓得好，冇乜夜醒爆喊嘅問題，咁佢瞓咗媽咪爹哋自然就收工，可以安心去夜街啦！

喺covid之前，我同孖仔爸爸都係請長輩幫手，我set好部baby monitor，就可以施施然出街，盡興至返歸，從來都冇需要長輩做任何嘢，佢哋喺廳睇電視就得

BB瞓得好，心情仲會靚啲開心啲，胃口又好啲，大腦發展都更好

而且，大人亦可以少樣嘢煩，輕鬆好多；小朋友唔抗拒瞓覺，大人唔駛發炆憎，親子關係都緊密啲添

唔好話出街，每晚喺屋企netflix唔會下下要暫停，去氹返BB瞓，成件事都已經唔同晒啦

P.S. 每月專題zoom class

《如何跟BB對話：減少育兒掙扎的竅門》

https://www.dolcesleepers.com/live-class/wsqt/register

☆☆☆

嬰幼兒睡眠顧問 Catherine

全港首位本地嬰幼兒睡眠顧問 ‧ RIE育兒法專業課程畢業生 ‧ 孖仔媽媽

網上課程 / 電話諮詢 / 免費資源分享

安全睡眠ABC