BB半夜瞓瞓下翻身，然後大喊，點算好？
「最近，BB半夜瞓瞓下翻身，然後大喊 次次咁醒法，然後要抱一輪先幫到佢瞓返… 想問下依個情況，可唔可以用咕𠱸，令佢冇咁易翻身呢？」
千祈唔好呀！
放個咕𠱸喺床仔，唔單止危險（窒息或二氧化碳中毒），而且限制住唔畀BB郁，其實冇咁舒服，你都唔鍾意喺飛機瞓啦！
而且，入睡時限制睡姿，習慣後半夜如果啲咕𠱸郁咗，BB自己去唔返一樣嘅睡姿，都會爆喊瞓唔返㗎！
BB瞓覺時翻身，係差不多每個BB都必定經歷嘅里程碑。
不過大人點樣處理，絕對會影響到BB幾時至完結到呢個過渡期（同啱啱識得企起身一樣 ）
基本上，如果BB冇大喊嘅話，就唔需要干預。就算佢醒咗喺度玩，佢冇叫即係冇需要人幫忙，佢可能enjoy緊me time，唔好騷擾佢啦
而如果BB喊嘅話，你可以坐喺隔離陪住佢，用sportscasting 嘅方式，形容佢嘅動作去畀佢知道你有關注住佢。
過幾分鐘後，見到BB未有跡象平靜落嚟，或者未能夠自己翻返轉，咁就可以抱起佢，安撫一下再放低。記得唔好直接喺床翻返轉佢呀！
咁樣做嘅目的，係畀BB一啲時間練習自己翻身，或者習慣趴喺度嘅感覺（BB自己翻身，同大人同佢做tummy time唔同）。
所以如果你即刻就翻返轉佢，佢就會失去咗自己嘗試翻返轉嘅意慾，每次都只會大叫，令過渡期延長好多㗎。
想知道點樣可以令BB唔會半夜醒咗，趴喺度大喊?
