你BB欠落睡眠債嗎?

你囝囝囡囡係咪喺下晝同黃昏時，會特別多哭鬧嘅情況，或扭計發脾氣呢？

BB大腦活動非常活躍，每分每秒都喺度吸收緊周邊訊息。

同時間，佢嘅嘅敏感度亦非常高。

由於BB大腦仍然未有過濾訊息嘅能力，於是我們好容易會喺無意之間令BB受到過度刺激。

例如，我哋諗住陪BB玩，或者帶佢返playgroup，能夠幫助佢學習，或者純粹係有多啲嘢玩令佢開心啲。

的確，BB對身邊事物充滿好奇，任何事都會覺得興奮刺激。

但一直保持住呢個狀態，其實對BB嚟講係好攰嘅事

你知道 RIE育兒法 都有playgroup嗎？但上堂嘅情況，同你想像中好唔同！

因為喺90分鐘內，BB都只會係自己喺地墊上自由活動，父母只係坐埋一邊觀察住BB，同埋從導師身上學習，點樣去同BB進行最低干預度嘅互動，以及處理唔同嘅情況。

有興趣嘅留言有影片連結

就算係喺呢個相對平靜放鬆嘅環境，RIE育兒法資深導師Janet Lansbury已經話，對BB嚟講係一件好攰嘅事嘞！

當刺激度及疲勞度超過咗BB能支撐到嘅界限，佢哋就會覺得煩躁不安、然後大喊，並且出現入睡困難、同埋瞓得唔冧易醒嘅情況。

之所以好多BB喺下晝同黃昏時段，心情特別差，就係呢個原因。

所以，希望BB能夠全日都保持住平靜愉快嘅心情，同埋容易啲瞓得到，瞓得好，就必須細心留意，可能會令BB受到過份刺激嘅情況（人、事、物）。

而且，亦必須要掌握好幾時要畀BB休息，避免BB出現疲勞過度嘅情況，尤其是夜晚臨瞓之前！

千祈唔好以為，畀BB玩得攰啲，或者夜啲瞓，佢就會瞓得好啲呀！

所有對嬰幼兒睡眠有基本認識嘅人，都聽過「睡眠生睡眠」（sleep begets sleep）呢句說話。

意思係指，BB日頭瞓得好，得到足夠休息，夜晚亦會瞓得好。

但如果BB攰得滯，或受過度刺激而瞓得唔好，就會欠落睡眠債。

欠得越多，就越難瞓得好 -- 小睡短，夜醒頻密，係最明顯嘅跡象。

點知BB係咪欠落睡眠債？

如果佢成日一上車就瞓著，或者成日玩玩吓、甚至食食吓飯恰眼瞓嘅話，即係話佢哋係好攰嘞...