你BB習慣點嘅睡姿呢?

你BB係咪好「鍾意」畀你抱住瞓，甚至只係某個抱法至肯瞓呢？

又或者，喺床度亦要某個指定姿勢至瞓得著呢？

呢啲要求/條件，究竟點樣形成㗎呢？

父母對於生活嘅選擇，會決定囝囝囡囡嘅生活方式。

因為，從我哋照顧BB嘅方式之中，BB會明白到應該抱住點樣嘅期望。

例如，每次氹BB瞓覺時都又抱又搖，BB就會認定想瞓覺時要有人抱住搖至得。

而BB通常會想繼續做佢哋所熟悉嘅事，呢個就係我哋稱之為「睡眠關聯」嘅現象（sleep association ）。

所以，就算每個家庭對於睡眠，都有唔同嘅做法及偏好，但其實全部都係我哋不自覺地同BB養成嘅習慣。

舉多個例子：

RIE育兒法 資深導師 Janet Lansbury 曾經喺一篇文章中分享：

親子課上有一個BB，習慣由媽咪著住孭帶畀佢瞓覺。

當媽咪希望改變BB嘅入睡方式，就遇到唔少困難，因為BB習慣咗瞓覺時雙腳懸空，而且依賴奶睡。

於是，當媽咪嘗試將瞓著咗嘅BB放喺嬰兒床，BB因為感覺到自己對腳掂到張床，於是即刻嚇醒咗！（呢個情景係咪好熟悉呢 ）

最後，佢哋搵咗一位嬰幼兒睡眠顧問，所得到嘅建議係：

喺BB仍然清醒，或至少未完全瞓著之前就放佢落床，而且放床前要畀BB見到張床，知道自己會被放低喺邊度，然後就畀啲時間BB去習慣新嘅睡姿。

分享這個例子，唔係想話千祈唔好奶睡或畀BB喺孭帶瞓覺（睡眠問題好主觀嘅，如果你覺得冇問題，BB又瞓得好，咁唔係話一定要改）。

舉呢個例子只係想指出，我哋嘅選擇，會對BB造成影響。

因為我哋所創造嘅環境同埋條件，會變成BB嘅習慣。

有啲BB比較容易接受改變，但有啲BB就會遇到較大困難。

聽日同大家分享，點樣可以減少BB面對轉變時嘅不安感。