照顧高需求BB, 係咪唔駛跟時間表?

「我BB係高需求寶寶，而且成日都唔願瞓，我係咪應該見佢攰至畀佢瞓，唔跟時間表好啲呢？」

所謂高需求寶寶，好多時其實即係比較敏感嘅BB，對環境、人、事、物、轉變等等，都會有比較大嘅反應。

照顧敏感BB嘅大人，自然亦需要敏感啲，至能夠瞭解BB嘅需要。

但係，咁並不等如就唔駛有時間表，由得BB自己斷電呀！

相反，正正因為BB好敏感，所以一個有常規嘅生活模式，先至能夠畀BB預計到即將會發生嘅事。

唔需要面對突如其來嘅轉變及刺激，咁至能夠安心入睡啦！

醫學上其實並冇就「高需求BB」落一個定義，但就有探討ADHD同睡眠嘅研究。

好多ADHD小朋友都係有難入睡、瞓得少、瞓得差、情緒唔好，同埋冇耐性易發脾氣等問題。

研究指出，顯示有ADHD症狀嘅小朋友，當睡眠質素得到改善後，ADHD症狀亦得到舒緩，甚至再冇表現出相關嘅症狀。

即係話，其實唔夠瞓，好可能係令小朋友過度活躍，唔願瞓覺嘅原因！

所以，唔去處理睡眠問題，只會令惡性循環加劇，更加難令小朋友瞓得好。

欠缺生活常規，夜晚就寢時間不定，係一個會造成長遠影響嘅問題。

當小朋友越大個，就越難去改變。

到時想佢有返個健康嘅生活習慣，就更難嘞