開始返學，會對睡眠造成影響嗎?

今日孖仔正式開始返學*

原本我有啲擔心，唔知佢哋放唔放我走…

點知琴日返咗2個鐘後去接佢哋，兩個玩到唔願走，孖仔F仲要同我講：

「拜拜媽咪 」

. . . . . .

之前睇咗好多資料做準備，結果都唔駛出動。

我諗之前同佢哋預告預告再預告係有幫助嘅。

搵咗學校嘅相畀佢哋睇，同埋描述學校會發生乜嘢事，畀佢哋做定心理準備。

不過又唔駛氹佢哋話學校好多嘢玩咁嘅，越用力去褒揚一件事，其實越可能令小朋友覺得有可疑

Btw，見到有啲媽咪喺免費睡眠工作坊群組話，小朋友開學後開始瞓得唔好。

呢個其實都係幾常見嘅情況嚟，一來因為返學其實需要好多體力，夜晚未有提早返畀小朋友瞓覺（要計返夜間睡眠時數，只係提早少少未必足夠），就好容易會因為疲勞過度而夜醒。

*孖仔本來習慣9點幾至瞓，用咗2個星期去做調整，加埋開始咗返學，呢兩晚都能順利8點瞓著，今朝瞓到7點鬧鐘發光

二來，任何轉變，對小朋友都係一個刺激，尤其是得2歲幾嘅人仔，返學咁多活動，令佢哋大腦好忙，亦會對睡眠造成影響。

三來，心理上亦都有一定壓力，孖仔雖然返happy school，呢兩日返到屋企都有情緒爆發嘅情況。

一般嚟講，只要夜晚瞓得足夠，應該就會好快回復正常。

有一點超級重要嘅係，唔好因為週末小朋友唔駛返學，媽咪爹哋唔駛返工，就畀佢夜晚遲啲瞓，然後朝早怒瞓補返...

雖然感覺上好似可以補眠，但其實咁做只會令小朋友嘅生理時鐘更加混亂。

而且，一時可以遲啲瞓，一時又要早瞓，會令小朋友無所適從，叫佢去瞓覺更加唔肯合作

瞓得足夠，對小朋友嘅學習同記憶能力都非常重要㗎！

想小朋友瞓得好，就算出現特殊狀況都可以快啲回復正常，最重要嘅係令小朋友鍾意瞓覺。

好多人以為做睡眠訓練就可以解決睡眠問題，一勞永逸。

其實睡眠訓練只能夠改善即時所面對嘅問題，但並唔一定能夠長遠令BB/小朋友瞓得好。

因為，唔同時期，自然會出現唔同嘅情況，令睡眠受到影響。

但只要睡眠基礎打得好，小朋友對瞓覺冇抗拒，自然所有問題都容易處理好多！

今日講到呢度先，過幾日睇吓孖仔情況點，再同大家報告！

P.S. 係呀，佢哋就嚟5歲，先至開始返學，諗住畀佢哋返小學前適應吓先。

我呢邊亦興9月中至開學（啲意大利人8月放假，唔駛旨意會有心做嘢 ）