搵出睡眠問題嘅真正成因, 至能夠令BB順利瞓得好

今日同一位媽媽傾電話，令我好感觸...

詳情唔方便講，但我真係好想話畀大家知：

當你想去作出改變，令BB瞓得好啲，你必須要有一個分階段嘅計劃，逐步去做。

當一個人睡眠不足，好自然會desperately用盡所有方法，務求頂得一陣得一陣（例如抱BB去大人床，但結果BB瞓到但大人冇覺好瞓）。

睡眠不足，冇辦法諗到咁遠好正常。

所以，作為睡眠顧問，我哋嘅職責除咗提供初步改善建議外（一般係營造安睡環境同調整作息時間），亦必須要幫手諗埋之後嗰幾步應該點做。

視乎BB同家庭嘅情況，抽絲剝繭搵出睡眠問題嘅真正成因，再去提供針對性建議，呢點係基本職業操守。

因為冇一套方式會適合所有BB。

尤其是改變入睡方式呢個位，係一件好delicate嘅事。

睡眠計劃必須要視乎BB及大人嘅情況同需要去制定，而且要有具體嘅細節，預先諗定每一個階段應該點做，至能夠達到最終目標（當然有可能需要作出調整，但起碼應該有去諗）。

重申：希望BB瞓得好，一定要退後一步，睇闊啲睇長遠啲。

就算係同一個睡眠問題，背後成因亦可能會有所不同。

唔去細心瞭解BB嘅情況，作出相應以及周全嘅對策，唔會徹底解決到BB嘅睡眠問題。

Cookie-cutter solutions，喺嬰幼兒睡眠呢件事上，成功比率一定好低。

而且，淚水亦一定多好多…