BB日頭食奶時成日瞓著咗，有冇問題呢？

初生BB體力低，加上母體褪黑激素影響，好容易就會瞓著。

尤其食住奶時（無論親餵或樽餵），吸啜動作對BB有安撫效果，於是啜啜下瞓著係好正常嘅情況。

未滿6個月嘅BB，對入睡方式未有好大依賴，所以間唔中奶睡唔係問題，瞓著咗放低佢喺床仔就ok（最理想係瞓醒時餵，就冇咁易瞓得著，呢個亦係唔駛跟足3/4小時cycle餵奶嘅原因之一）。

除非大人習慣見BB扭計就餵奶，然後BB瞓著咗…

咁做就等如，大人訓練BB眼瞓時食住奶瞓囉…（所以知道幾時要畀BB瞓好重要，千祈唔好等到佢捽眼打喊露甚至扭計至畀佢瞓呀！）

之不過，有一個情況吓，食奶瞓著會係一個需要盡早處理嘅問題：

如果BB食奶時合埋眼啜，食完就開眼醒晒，之後想氹佢瞓但攪極都瞓唔到，就要注意嘞！

就算只係瞓著幾分鐘，已經足以消除睡意，reset咗個清醒時間。如果你係跟食玩瞓cycle去畀BB瞓，而唔係睇住清醒時間，亦會好易錯過入睡最佳時機。於是當你之後想氹BB瞓，就會好大掙扎攰極都瞓到，形成惡性循環嘞 🙈

但BB一啜就瞓著，可以點做呢？

當你見到BB想瞓，先嘗試捽吓佢嘅手腳，同佢講吓嘢，睇吓可唔可以令佢保持清醒，起碼食完至瞓。甚至，可以除咗BB件衫，涼爽一啲亦會冇咁易瞓得著。

另外就係唔好拘泥於3/4小時餵一次奶呢個做法，兩餐奶之間相隔2.5-4小時都可以，喺BB瞓前醒後餵奶，而唔好被餵奶時間帶住瞓覺時間。

BB唔餓會食少啲，餓就自然會食多啲（有厭奶情況例外）；但BB太眼瞓會瞓唔著，而且瞓得唔好容易醒。

要及時處理呢個問題，需要時間及耐性。

因為BB一直以嚟瞓得少，係需要時間去瞓返多啲，慢慢恢復體力，至能夠令佢唔會再一啜就瞓著㗎！