我的宗旨，是每個人都有權睡得好

［Dolce Sleepers 4周年有感］

2019年5月29日，我喺Dolce Sleepers專頁分享第一個post《你知道我每天要睡幾多小時嗎？》

當時，香港並冇專為本地家庭提供廣東話諮詢服務嘅 嬰幼兒睡眠顧問，亦冇任何專門分享嬰幼兒睡眠資訊嘅平台。

一開始，我只提供一對一電話諮詢服務，日日睇住睡眠記錄，話畀媽咪爹哋知點樣調整作息時間，同埋處理唔同情況嘅做法。

有啲媽咪爹哋希望得到貼身支援，會日日send幾十個message畀我，寫睡眠記錄亦非常詳細。

亦有啲媽咪爹哋鍾意自己處理多啲，唔會主動message我，於是通常等咗幾日至由我去追問BB情況。

慢慢Dolce Sleepers建立咗口裨，越嚟越多人查詢，我亦發現好多家庭受各種條件所限，唔能夠參加電話諮詢計劃去改善BB嘅睡眠問題。

於是，有一個諗法喺我心入面逐漸浮現...

喺2021年9月，我出咗個post 我唔想只係做一個睡眠顧問。

我希望成為一個parent educator，推廣健康睡眠。

我希望令多啲人知道，睡眠問題唔單止能夠解決，仲可以預防（趁BB未滿6個月前，係培養良好睡眠習慣嘅好時機）。

我希望可以令多啲人明白到，睡眠並非一勞永逸嘅事，睡眠顧問只能幫到一時三刻，長遠都係需要媽咪爹哋自己學識點樣處理唔同嘅情況至得。

而且，我希望每個月唔止幫到幾個家庭，而係可以幫到幾十甚至幾百個家庭。

所以，喺2022年5月，［Dolce Sleepers嬰幼兒睡眠資訊］正式改名為［Dolce Sleepers正向睡眠及教養學堂］。

之所以叫［學堂］，因為我嘅目標係建立一個平台，畀媽咪爹哋能夠輕鬆學習到獲得最新研究支持（evidence-based）、以及真正長遠有效嘅育兒方式。

好多研究都指出，充足睡眠，係一切嘅基本（無論對BB或大人都係）。

我相信，每個人都有權瞓得好。

唔應該只有能夠付出幾千蚊搵睡眠顧問嘅家庭，至可以瞓得好；又或者因為土地問題而冇辦法為BB提供最佳睡眠環境嘅家庭，就只能一直死撐落去冇覺好瞓。

所以，我決定提供一個有彈性嘅方式，滿足不同家庭不同程度嘅需要，令健康睡眠可以喺香港越嚟越普及。

因為以上種種原因，我將Dolce Sleepers嘅重心移咗去網上課程［睡眠調整全面睇］，經過兩年幾以嚟收集到嘅意見，不斷調整課程形式及內容，發展出 全港唯一 一個設有群組諮詢及長期支援嘅網上睡眠課程。

課程包括：

- Zoom歡迎會：一對一做初步諮詢

- 教學影片：配合 RIE育兒法 嘅睡眠資訊

- 可下載內容：投影片大綱及各種備忘錄

- FB學員專屬群組：隨時出post發問

- 常見問題集

- 電話諮詢：可以隨時預約（額外收費）

多謝超過570個家庭嘅信任，報讀［睡眠調整全面睇］，亦好多謝咁多位喺群組義務回答問題嘅媽咪。

有你哋嘅支持，我至可以一步步向住目標邁進，幫更多家庭擁有健康睡眠，令更多父母能夠同BB建立安全型依附關係（secure attachment）。

嚟緊呢幾個月，我會集中精神開始著手籌備一個已經度咗年幾兩年嘅計劃，敬請密切留意。

Btw，如果你唔知道嘅話，Dolce Sleepers背後嘅大腦其實得我一個 – 孖仔媽媽Catherine。

所以我非常需要大家嘅feedback！你可以隨時pm我提供意見，話我知你喺邊方面需要協助，或者我可以點樣幫到你㗎。

唔覺唔覺又寫到好長，今日講到呢度先啦！

P.S. Dolce Sleepers亦有好多免費資源，包括近500篇睡眠文章、工作坊、講座，以及課程，歡迎瀏覽Dolce Sleepers網站，大家可以各取所需。

唔想錯過正向睡眠及教養文章分享，立即加入whatsapp群組啦！