媽媽嘅情緒，又有冇人承接住呢？

成日話要同BB／小朋友 BeingWith，要接納同肯定佢哋嘅情緒... 但作為媽媽，我哋自己嘅情緒，又有冇人承接住呢？

早幾日收到Janet媽媽嘅message，從佢嘅文字之間，我知道佢好急切需要幫助，於是開多咗個timeslot，約佢第二日下晝電話傾。

Janet媽媽提到，佢好驚BB瞓得唔好夜醒大喊，亦好驚BB嘈醒其他屋企人。

見到同年同月媽媽谷，其他媽媽話BB滿月已經戒咗夜奶，又話要同BB做cry it out至可以一覺瞓天光...

Janet媽媽覺得有好大壓力，唔知點解佢BB每晚仲會醒2-3次，而且又好唔忍心由得BB喊唔理佢，所以覺得好無助。

我聽住佢講，覺得好心噏。

其實，Janet媽媽已經做得好好，佢BB嘅睡眠情況亦唔係真係咁差（起碼唔係要抱住氹好耐，一放低又醒嘅情況）

當Janet媽媽聽我講到，只得5個月嘅BB有夜醒及需要食夜奶係正常嘅事，佢鬆咗一口氣～

之後我再講解咗點樣安排作息時間，去配合返佢BB嘅睡眠需要，以及預先計劃好夜醒嘅處理方式。

然後，只係過咗2日，就收到Janet媽媽嘅好消息：

BB再冇夜醒爆喊，一覺瞓天光嘞！

點解咁神奇？除咗掌握好就寢時間之外，重點其實係Janet媽媽嘅心理狀態。

照顧BB呢份工作（無論係全職定在職媽媽），只能不停付出，但好難得到肯定及認同。

如果冇一個出口，內心嘅憂慮同壓力越積越多，加上咁多個月冇覺好瞓，會令人抖唔到氣，越嚟越迷惘，自我懷疑甚至自責...

呢個其實亦係BB唔能夠瞓得安穩嘅原因，但好多人從來冇諗過呢點！

所以，擁有願意聆聽，能夠明白同瞭解自己，以及會欣賞自己嘅人，成為情緒支援，非常重要...

希望大家都能夠搵到自己嘅support system！

*得到Janet媽媽同意分享佢嘅文字

Update：Janet媽媽又再message我，BB又再次冇夜醒，一覺瞓天光嘞！當［神奇］嘅事連續發生，就唔再係神奇，而係問題已經得到解決。

P.S. 有關夜奶，可以睇睇呢篇文章。

唔想錯過正向睡眠及教養文章分享，立即加入whatsapp群組啦！