帶孖仔去旅行，一定要帶⋯⋯

同小朋友去完旅行，返到屋企第一樣要洗嘅係乜嘢？

有幾位媽咪都估中呀！就係 -- 陪睡公仔嘞！

陪睡公仔係transitional object嘅一種，能夠畀到小朋友安全感，另一種常見嘅transitional object係薄被。

陪睡公仔除咗瞓覺時要攬住之外，平時開心時同公仔玩，唔開心時會攬住公仔喊，係小朋友嘅好朋友。

之不過，陪睡公仔唔會代替到媽咪，所以唔好諗住小朋友喊就塞隻公仔畀佢

好朋友，通常係由小朋友自己揀，冇得迫佢要。

有媽咪曾經同我講過，想畀隻公仔囝囝陪佢瞓，但囝囝一直都唔理隻公仔，直到有一日去街，囝囝突然對一隻熊仔一見鍾情 ，從此一直攬住瞓得好甜

注意陪睡公仔要等小朋友1歲後至可以開始用，因為安全起見，頭12個月唔能夠有軟身物品喺睡眠範圍內。

而且陪睡公仔對得幾個月嘅BB嚟講，作用亦好有限（要嚟咬或啜住瞓例外，但唔建議咁用 ）

陪睡公仔話明陪睡，一般係瞓覺時用。不過有時小朋友會要求去邊到帶住，呢個就要睇家長自己嘅諗法嘞。

對我嚟講，床要保持乾淨，所以最多都只會畀孖仔喺房玩，唔會拎出客廳，更加唔會帶出街。

另外，陪睡公仔有幾隻後備係好啲，不過其實小朋友會識得分

孖仔A隻陪睡公仔叫「穿窿貓貓」，孖仔F嗰隻叫「軟林林熊熊」，雖然佢哋而家床上會正選後備喺埋一齊（有一日畀佢哋發現咗櫃桶有另一隻 ），不過攬住嘅只會係嗰一隻。

無論喺邊度瞓覺（喺街除外），我都會帶住兩隻公仔，去旅行當然都唔少得啦！

想知道更多有關陪睡公仔嘅貼士，可以睇睇呢篇文章