100日大BB，拜年時都可以自己啜手指入睡

好多謝咁多位pm我拜年嘅媽媽呀！

其中一位媽媽仲同我分享佢嘅喜悅，好想share埋畀大家。

話說，Connie媽媽嘅細囡一出世，已經因為成日有肚風而瞓得唔好。

不過去到3個月大，情況有好轉後，Connie媽媽就開始堅持跟清醒時間畀BB瞓覺。

慢慢夜間睡眠時間開始穩定，每晚同一時間醒咗食夜奶，食完就順利瞓返。

年初一，喺廿幾人有大有細，極度嘈吵嘅環境底下，Connie媽媽嘅BB竟然都能夠自己啜住手指入睡。

Connie媽媽非常驚訝，更重要嘅係，佢對佢BB更有信心，知道佢有能力可以自我安撫入睡，唔係一定要抱或啜住奶至得！

我相信，有過呢次經歷，Connie媽媽將會能夠更有把握，繼續幫佢BB培養良好睡眠習慣。

而且，就算 4個月睡眠倒退期 殺到，只要平時瞓得足夠，都能夠好快重回軌道。

當然，唔係個個BB都會可以自己shut off入睡，大部分BB喺人多嘈雜嘅地方，都好容易受過度刺激而大喊，又或者即場冇喊，但返到屋企至嚟料（甚至之後嗰幾日）。

只不過，搵到個平衡真係好重要。

喺呢啲大時大節，BB嘅作息時間少不免會受到影響。

平時有穩定作息嘅話，遇到呢啲情況係會好頭痛，唔知點調整好。

但係有時 隨遇而安 ，唔好未出發先擔心，咁就唔會中咗 自我實現預言，BB反而能夠安心啲，睡眠受影響嘅機會，反而會細啲。

好好enjoy同親朋戚友相聚嘅時刻啦！

#我哋冇得過農曆新年

#初二已經要返工返學

#冇得收爐

P.S. 有親朋戚友嘅BB瞓得唔好？邀請佢哋睇免費睡眠大工作坊啦！

P.S. 唔想錯過更多正向睡眠及教養貼士，歡迎加入whatsapp broadcasting 群組。