如何同囝囝囡囡同安撫公仔做好朋友

冇諗到有咁多媽咪想知道，有關安撫公仔嘅問題。係咪因為覺得有隻公仔，囝囝囡囡就會嗌少啲「媽~咪~~」呢？

點樣令囝囝囡囡同安撫公仔做好朋友？

首先有幾點要講清楚：

1）基於安全問題，1歲前唔應該有任何軟身物品喺BB嘅睡眠環境內（無論係嬰兒床或與大人同床）。

伸延閱讀：《美國兒科醫學會的安全睡眠建議》

2）如果你希望BB喊時塞個公仔畀佢，佢就唔會搵你，對唔住，咁樣係唔work嘅，因為冇任何嘢可以完全取代到媽咪喺囝囝囡囡心目中嘅地位。安撫公仔其實只係喺小朋友心情好時發揮到作用，如果佢攰得滯已經情緒失控，安撫公仔唔會令佢冷靜到落嚟。呢個時候你塞隻公仔畀佢，更可能會有反效果...

如何挑選安撫公仔？

尺寸不宜太大，避免小朋友會踩住用嚟借力擒出床，大概30cm左右就好。另外就係一定要可以機洗，而且一買要買起碼3隻，洗咗或唔見咗都有隻後備。我通常建議去ikea買，品質好價錢靚，仲可以帶埋小朋友去畀佢自己揀（畀佢拎一隻好嘞，跟住記得放多兩隻一樣嘅入購物袋 ）。

如果屋企已經有好多公仔唔想買，亦都冇問題，你可以喺睡前儀式加一個步驟，問囝囝囡囡想要邊隻公仔陪佢瞓覺。

如何建立感情？

講明先，以下呢個程序，係會需要不斷重覆幾日去做嘅，未必會第一次做就即刻一見鍾情（但又唔代表冇可能嘅，尤其是一向床入面咩都冇嘅話，有隻公仔自然會攬得實啲）

1）拎隻畀你囝囝囡囡，然後緊緊擁抱佢（公仔喺中間），將情感「轉移」到公仔身上

2）抱完後講：「熊熊，請你陪住（小朋友名）瞓覺嘞！」

3）眼望囝囝囡囡，用溫柔但肯定嘅語氣預告：「而家我畀你同熊熊一齊落床嘞！」

4）放床時，一直保持眼神接觸

5）落床後，摸摸囝囝囡囡及熊熊個頭講：「而家瞓覺嘞，Goodnight！」

備註：

*安撫公仔應該只有一隻，唔建議放到成床都係，否則半夜會難搵得返。

*注意落床時間，唔好等囝囝囡囡已經好攰至落床，攰得滯心情唔好肯定會大喊㗎！

當然，如果你囝囝囡囡慣咗奶睡搖睡抱睡，未必會咁順攤，肯就咁留喺床瞓，又或者可能會肯留喺床，但就掛住玩唔瞓。

咁嘅情況，PM我啦！我可以幫你定立一個全面嘅睡眠計劃，由環境、時間表、心理等等方面著手，幫你同你囝囝囡囡瞓得好啲

「為孩子創造一個放鬆和可預測的整體環境，不要把如何令孩子入睡看成獨立的問題。」

~Magda Gerber（RIE育兒法創辦人）