囝囝一定要攬住我瞓，係咪無得救？

有媽咪問：「囝囝細個時習慣抱睡，後來大個咗可以喺床瞓，但就一定要攬住媽咪至得，係咪已經冇得救呢？」

好多人都會建議，畀個公仔或攬枕小朋友，希望佢會慢慢習慣唔駛要媽咪都得。

但我可以好老實咁講...

冇嘢可以完全取代到媽咪...

係可以嘗試用公仔或攬枕，但最終都係要媽咪決心設限。

而要成功設限，令小朋友唔會覺得媽咪唔理佢而冇咗安全感，首先第一點就係要喺小朋友未去到疲勞過度嘅狀態，至能夠令佢容易啲接受轉變，能夠安心去瞓。

呢點其實亦係融合咗RIE育兒法嘅 Dolce Sleepers 睡眠心法之一。

放電就可以瞓得好？

有啲人會話，同小朋友放電，夜晚晏啲至瞓，拉長啲個清醒時間，就會容易啲瞓得著，夜晚醒少啲。

係呀，令到小朋友斷電瞓著，係會可以縮短入睡時間，不過呢個並非可以長期執行嘅方式；長期睡眠時數過短，亦都非常唔健康。

而且，當小朋友已經好攰好攰，對改變一定好抗拒。

你諗吓，當你好攰好想瞓，有人同你講要你轉瞓第二張床，或者要轉枕頭床單，你都唔願意，覺得好煩心情差啦！

而且，攰到斷電瞓著，夜晚當然瞓得唔好會醒，難自己瞓得返，呢個係科學研究話畀我哋知嘅事實。

可以唔駛再攬住瞓嗎？

要攬住媽咪 / 爹哋 / 婆婆嫲嫲 / 工人姐姐瞓呢啲情況，喺香港其實好普遍。

我見過好多媽咪都可以成功改變得到，重點係：

• 做好事前心理準備

• 掌握好放床時間

• 瞭解小朋友對改變嘅接受度

• 再去諗用點樣嘅方式，以愛設限

我相信，健康睡眠係每個BB同小朋友嘅基本生理需要（大人都一樣需要）。

有啲人話香港小朋友比外國小朋友活動得少啲，所以需要瞓得少啲，清醒時間可以更長，呢個講法我絕對不同意

話小朋友習慣要媽咪攬住瞓係改變唔到，夜醒問題亦冇得解決，絕對唔係咁！

☆☆☆

嬰幼兒睡眠顧問 Catherine

全港首位本地嬰幼兒睡眠顧問 ‧ RIE育兒法專業課程畢業生 ‧ 孖仔媽媽

網上課程 / 電話諮詢 / 免費資源分享