Dolce Sleepers 正向睡眠及教養學堂

唔經唔覺，Dolce Sleepers專頁已經踏入第4年嘞！

多謝各位媽咪爹哋嘅支持及鼓勵，我至能夠繼續的起心肝寫文，同大家分享更多睡眠及教養心得。

以前我成日話要調整好各項安睡因素，BB至能夠瞓得好。

但我越嚟越覺得，單單睇睡眠都已經唔足夠...

好多時同媽咪爹哋傾電話，為咗能夠全面一啲，我亦會提供RIE喺其他育兒範疇上嘅建議。

於是，我慢慢形成咗一個諗法：

用正向教養嘅方式處理睡眠問題；以健康睡眠為基礎去面對育兒挑戰！

所以，我今日正式宣佈，Dolce Sleepers 將改名為 「Dolce Sleepers 正向睡眠及教養學堂」

我plan緊好多計劃，除咗睡眠之外，亦會同大家分享更多正向教養方面嘅資訊。

或者你會問：Catherine，正向教養好多人都有做緊，你講嘅有乜嘢特別先？

的確，唔好話外國，香港都已經有好多育兒專家，提供各方面嘅意見。

所以我絕對唔敢話自己係專家，暫時亦未有一個嘅專業資格。

但我會以孖仔媽媽呢個過來人身份，用最簡單直接嘅方式，去同大家講解專門適用於0至3歲 呢個階段嘅建議。

3歲定80

坊間嘅育兒資訊或課程，都係偏向大個啲嘅小朋友 — 已經識得講嘢，會駁咀嘅小朋友…

但對於未識講嘢表達自己，只能用喊聲去同我哋溝通嘅BB，好多人都會忽略咗呢個階段對未來嘅影響。

0-3歲係BB大腦發展最急速嘅時期，係佢哋建立自我、價值觀、待人處事態度 等最關鍵嘅階段。

啲人話「3歲定80」— 即係話，未夠3歲之前，你係有好多嘢可以做，去幫到你同小朋友一齊走上正確軌道，從而減少日後好多掙扎同對立嘅情況㗎！

RIE育兒法正正就係針對呢個年齡階段嘅育兒方式，係全世界唯二教導照顧者點樣同BB相處嘅機構（另一個係Pikler，同RIE其實同一根源）。

所以，我希望能夠幫到大家，用正向教養嘅方式去處理睡眠問題；令多啲人知道，狠心掉BB落床做睡眠訓練並非唯一途徑。令BB安心入睡，鍾意瞓覺，至能夠長遠解決睡眠問題。

而當大人同BB都瞓得好，心情自然靚啲，面對設限及管教問題上，大人能夠更有耐性，小朋友亦更易接受「NO」— 以健康睡眠為基礎去面對育兒挑戰！

好嘞我暫時講到呢度先，否則寫落去會停唔到

再次多謝你哋，一直以嚟對我嘅支持。多謝你哋對我嘅信任，特別係選擇咗Dolce Sleepers幫手解決BB睡眠問題嘅800幾個家庭。亦好多謝願意花時間寫review嘅媽咪爹哋，令Dolce Sleepers可以畀多啲人認識。

我會繼續自我增值，希望能夠將更多更新嘅睡眠及育兒資訊帶畀大家，令更多香港家庭能夠輕鬆啲，好好享受同BB相處嘅時光。

Add：我已經喺2022件年8月，獲得「正向教養家長講師」資格。我會繼續努力，協助香港媽咪爹哋處理睡眠及其他育兒挑戰！

正向睡眠顧問™ + 正向教養家長講師＋孖仔媽媽 Catherine

用正向教養的方式處理睡眠問題；

以健康睡眠為基礎面對育兒挑戰！