諗住用白噪音，介紹大家呢兩個手機APP

白噪音，係咪真係有安眠作用，可以令BB容易啲入睡同瞓得好呢？

答案：唔係你想像咁囉

對於初生BB嚟講，白噪音能營造返喺媽咪子宮內嘅聲音，增加熟悉感。

不過講到播啲聲就能夠令BB入睡，未免太誇張

白噪音唔會有催眠作用，希望BB容易啲瞓得著，重點係注意清醒時間（喺1月嘅免費工作坊，我教咗大家5招解決入睡困難嘅問題，你睇咗未呢？ 詳情可以睇呢度。）

而當BB脫離初生階段，白噪音嘅作用，最主要係用嚟遮蓋環境嘈音，例如車聲狗吠聲等。原因係，一啲突如其來嘅聲音，會干擾入睡。而當BB進入淺睡期，亦比較容易被噪音整醒。

另一個用處，係作為睡眠訊號，令BB慢慢習慣，聽到聲就知道要瞓覺（同睡前儀式其他步驟一樣，需要時間㗎！同埋記得要臨瞓至開，唔好一入房就開呀！）

只不過，係咪一定要用呢？

唔係囉！孖仔由細到大都冇用過（我住山上小鎮好靜 ）。當然，香港環境好多時都真係需要冚一冚街外聲音，或者哥哥姐姐喺廳玩到好興奮嘅聲音

成日有媽咪問：Catherine，可以推介買邊部白噪音機嗎？

我會話：你有冇部舊嘅手機？Download個免費app就得啦，唔駛嘥錢特登買部機囉。

要注意嘅係，記得揀個可以offline用，而且冇限時間嘅app（或可以set到12個鐘），仲要冇廣告彈出嚟令白噪音停止至得喎！如果你去app store search "white noise"，會彈個超長嘅list ，花多眼亂唔知點揀

我可以推薦2個app畀大家

第一個介紹嘅係 "White Noise For Baby"（Android），呢個app最好嘅係有fade in fade out，唔怕突然開聲會嚇親BB。而且介面超簡潔，又冇廣告，一開就用得

另一個介紹嘅係 "White Noise Lite"（iphone），第一次用時揀定咗個聲音及音量，個app就會記住，一開就播到唔駛再篤嚟篤去。

提多句，開手機始終有光，所以最好喺熄最後一盞燈之前至開，部機畫面亦要較暗啲，背住BB開會比較理想。

視乎噪音來源，部機可以放門邊或窗邊，要盡量遠離BB，最少留2米比較理想。

另外，好多時亦有媽咪爹哋擔心，長期開住白噪音，會影響到BB嘅聽覺，甚至語言發展。

其實只要用得正確，係唔會有問題嘅！

而且，BB瞓著後熄機嘅話，當BB去到淺層睡眠發現冇咗聲，出現 #睡眠環境改變，就好易會醒。呢個時候至再開返部機（自動開都一樣），已經遲咗㗎嘞

至於有冇影響呢點，我之前寫過一篇文章，click去留言睇返啦

☆☆☆

 嬰幼兒睡眠顧問 Catherine

全港首位本地嬰幼兒睡眠顧問 ‧ RIE育兒法專業課程畢業生 ‧ 孖仔媽媽

網上課程 / 電話諮詢 / 免費資源分享