美國兒科醫學會的安全睡眠指引

有媽咪send咗篇有關一名3個月大BB喺「趴睡訓練」中意外身亡嘅報導畀我。見到發生啲咁嘅事，真係好心傷，同時亦嬲到震！

如果呢位「老師」對安全睡眠有基本認識；如果呢位「老師」對嬰幼兒睡眠有正確嘅觀念；如果呢位「老師」會珍惜嬰兒嘅生命...呢件事根本唔會發生！

前幾日我出咗一篇有關趴睡嘅文章。

而家作出幾點補充，希望大家可以 #幫手宣揚開去，令香港嘅媽咪爹哋對安全睡眠有多一啲醒覺，唔好繼續抱住「個個都係咁，邊會有事吖！」嘅心態，避免相似嘅悲劇再次發生。

***

我所提倡嘅安全睡眠建議，由美國兒科醫學會（AAP）所發出，係一套通用嘅標準，適用於1歲前嘅嬰兒。

資料來源：https://www.healthychildren.org/.../A-Parents-Guide-to...

第一點係，無論日夜，都必須將BB以背脊向下嘅姿勢放落床。

但如果BB已經可以輕易咁翻身，就唔需要將佢翻返過嚟仰睡，而可以「由得佢」趴睡。

「由得佢」嘅意思，即係唔鼓勵，但亦唔需要反對。因為趴睡絕對唔係乜嘢「技能」，需要「解鎖」。就算BB趴睡，亦唔代表佢會瞓得好，可以一覺瞓到天光。

所以，如果BB翻身後大喊，你係必須幫佢，唔可以由得佢大喊唔理！

更重要嘅一點係，BB嘅睡眠範圍，必須要清空，尤其是BB會趴睡嘅話， 一定唔可以有任何軟身物品，例如枕頭、棉被、公仔、攬枕、哺乳枕、分隔床、以及縛喺床邊，聲稱能夠「保護」BB嘅床圍。

軟身物品除咗可能會遮到口鼻影響呼吸外，亦可能會引致二氧化碳中毒！

床圍條繩有機會會纏住BB條頸，而就算係聲稱能透氣嘅網狀床圍，一樣危險。

驚BB夜晚凍親，或者手腳被床欄kick住嘅話，可以用睡袋㗎，而且仲有其他好處添！ 

好多人唔知道嘅一點，就係BB必須要瞓喺一張堅硬嘅床褥上。要有幾硬？

BB瞓落去唔會下陷就可以嘞，否則趴睡時面向下嘅話，BB就會無辦法呼吸。

而且，張床單亦必須要緊緊包住張床褥至得，唔可以太大張突晒出嚟。

千祈唔好將BB放喺梳化上瞓覺，如果BB喺躺椅、搖搖椅、可傾斜式餐椅、汽車座椅、BB車（有可平躺嘅嬰兒籃除外），或孭帶上瞓著咗，應該儘快將BB轉移返去平坦嘅地方繼續瞓覺。

好難？BB會即刻醒？咁就應該直接畀BB喺床上入睡嘞，除咗安全外，BB亦能瞓得好啲，唔會一開眼唔知自己喺邊而嚇醒！ 

最安全嘅做法，係最少頭6個月，大人同BB同房不同床，甚至去到1歲。

AAP唔建議母子同床，因為無論你幾小心，都仍然存在一定風險。

喺以下幾個情況下，會更加危險：
- 4個月以下初生嬰兒
- 早產嬰或出生即體重過輕嘅BB
- 父母或其他同床者係吸煙人士（就算唔會在床上煲煙）
- 媽媽喺懷孕時有食煙嘅習慣（就算之後戒咗）
- 就寢前服食過會令人昏昏欲睡嘅藥物（攰得滯可能會瞓到不醒人事嘅話，其實一樣危險）
- 飲咗酒
- 同BB一齊瞓嗰個唔係BB嘅父母，例如係工人姐姐
- 瞓覺張床太軟，例如舊床褥，或梳化等- 床上有軟身物品

包巾有助初生BB瞓得好啲，但當BB開始出現想翻身嘅跡象，就必須停止，畀他雙手能夠自由活動。

奶咀有助減低發生嬰兒猝死症嘅風險，但亦無須強迫BB使用。 

最後提返一句，睡眠訓練應該等BB滿6個月後至開始，而且完全唔需要留低個BB喺房由佢喊到瞓著嘅！

想BB學識自行入睡，方法有好多，你絕對可以留喺BB身邊安撫佢，Cry it out (CIO) 已經過時㗎嘞！