小朋友唔肯上床瞓覺？試吓呢招啦！

因為已經開學，需要孖仔合作早早上床瞓覺，所以調整咗睡前儀式。

其實原本已經冇乜儀式可以言，冇次序咁做晒啲嘢，最後由孖仔爸爸講故事，然後我再去道晚安閂門。

但自從去完旅行返嚟，孖仔爸爸偷懶唔再講故事（孖仔亦冇再要求），於是上床前嘅時間拖長咗

所以，而家刷完牙同除衫後（太熱唔著睡衣 ），我就叫孖仔自己去揀本書，拎畀我同佢哋一齊睇。

然後，唔記得點樣開始（應該係孖仔A提出），佢哋放返好本書後，就會喺地下爬嚟爬去扮BB，叫我用抱BB嘅方式抱起佢哋（橫抱），再唱住「月光光」搖幾下 佢哋就會微微咀笑合埋眼扮瞓覺

做戲做全套，先預告後放床（或者A聽到我唱到「蝦仔你乖乖瞓落床」會叫我放佢落床），拎個公仔畀佢哋抱住，再冚好被錫一啖say goodnight

成個過程都不過係一兩分鐘嘅事，但我哋都好enjoy，亦唔駛再叫幾次至肯收埋啲lego上床，大家都happy好多

希望得到小朋友合作，connection永遠係必勝嘅招數

你上一次打橫抱你小朋友係幾時呢？試吓啦

P.S. 橫抱嘅好處，係可以身貼身之餘，同時能夠四目交投，sweet好多㗎！