Eling媽媽分享 - 關於陪睡公仔

琴日同大家講到關於陪睡公仔嘅問題，之後就收到Eling媽媽嘅分享：

「見到你分享陪睡公仔嘅post，我都想分享下。 我大仔而家就快4歲，響佢差不多1歲3個月左右，佢突然好依戀一條薄毛巾。本身條薄毛巾，係當佢響我媽咪屋企瞓嘅時候先會用 （一星期大概2晚左右），但佢突然有一晚 ，一定要有果條薄毛巾先瞓到覺。自此之後 佢連出街，番daycare 都要拎住。

因為衛生問題，我幾乎每日都要拎去洗。最初係偷偷地當佢唔覺眼嘅時候拎去洗，但當然佢發現咗就會爆喊... 之後當佢大多少少，理解能力好啲 ，我嘗試改變方法，話比佢聽因為拎過出街有細菌，所以要拎去洗 ，但瞓覺之前一定會比番佢，咁佢就ok我每日拎去洗。

一直持續左大半年時間，雖然一直相安無事，但我心入面一直都有隱憂，就係佢愈來愈大個，到底佢會拎住條毛巾到幾時呢？我又應該點樣先可以幫到佢戒呢？

點知，神奇嘅事情就發生喇！就響上兩個星期，我如常響佢由daycare，番屋企之後就拎佢條毛巾去洗，佢突然之間話唔想。我再一次解釋比佢聽因為有細菌，所以要洗，佢答我：好啦！但係我唔想毛巾成日都要去沖涼，我聽日開始唔再帶佢番daycare。我當然即刻話好，但心入面都半信半疑。到咗第二日，臨出門口之前，我問佢係咪要拎毛巾，佢答我：唔拎喇，因為我唔想佢沖涼。

就係咁，佢就冇再拎條毛巾番daycare同埋出街喇！我發現，原來有啲嘢真係唔需要逼同擔心太多。小朋友準備好，就自然會做出選擇同改變 」

的確係㗎！當擁有足夠能力，加上心理準備好，小朋友自自然然就能夠做到好多嘢。唔駛大人特登去教，或者訓練。