要返下午班，撞咗午睡時間，點算好？
最近成日收到同一個問題，都係關於一個可能係香港小朋友獨有嘅問題...
「要返下午班，撞咗午睡時間，點算好？」
點解話香港獨有呢？
因為其他國家一般只會有全日或半日（上午）之分，唔會有下午班呢樣嘢...
一般嚟講，小朋友會喺15-18個月嘅時間轉為每日只瞓一次晏覺，時間應該係食完lunch後。
正所謂：「食飽睡一睡，好過當元帥」
呢個晏覺，一般會瞓1.5-2.5小時，視乎小朋友年紀，同埋夜晚幾點瞓而定。
通常建議近3歲至停止午睡，最早都2.5歲，有啲小朋友要瞓到5歲添！
所以，下午班呢樣嘢，喺小學前其實唔應該存在...
無奈，喺香港呢個講求贏在起跑線嘅地方，我完全明白家長希望幫小朋友搵間好啲嘅學校呢個心態。
加上香港多雙職父母，小朋友早啲返學，會容易處理啲。
但可以嘅話，我都會建議起碼等小朋友3歲後至返學。
（孖仔4歲半都未返學，嚟緊9月都唔知開唔開到學添！雖然佢哋26個英文字母都未識得晒，但佢哋嘅創意力量同幻想，會嚇你一跳 ）
好嘞，咁冇辦法下撞咗，點算好呢？
視乎小朋友而家朝早幾點醒啦，早嘅話可以試吓畀佢喺返學前瞓個短覺，放學後儘量做啲平靜啲嘅活動，早啲食飯畀佢去瞓，夜晚預返11-12小時。
有需要嘅可以放學後都畀佢瞓20分鐘，返屋企時喺車瞓會易啲處理，注意瞓得長咗至叫醒佢嘅話，心情會惡劣啲㗎
如果朝早唔肯瞓，咁我都係建議放學短睡就好，唔好畀佢瞓個幾兩個鐘咁耐呀，否則夜晚同你玩到12點
健康睡眠，對小朋友嘅記憶及學習能力有直接影響， 午睡係大腦鞏固記憶嘅時候，冇瞓覺休息嘅話，學完啲嘢都會畀返晒老師㗎...
即share畀有囝囝囡囡嚟緊要返下午班嘅朋友啦！
