所有數字都只係用嚟參考
你有冇睇過《倚天屠龍記》呢？
喺書入面，張三丰教張無忌太極嘅口訣，叫佢記低晒每一招每一式之後，再忘記晒佢。
目的係要佢能夠融匯貫通，視乎情況而出招，至能夠發揮出太極真正嘅威力
其實，嬰幼兒睡眠都一樣
初次接觸健康睡眠，最容易理解嘅就係一堆數字...
清醒時間、小睡次數、小睡長度、夜晚幾點要瞓、要瞓幾耐等等...
差不多個個睡眠顧問都會講呢啲嘢。
呢堆數字，當然有佢嘅存在價值。
只不過，如果你試圖跟住呢堆數字，希望令到你BB能夠跟到個時間表足一足，其實係往往會令你好氣餒...
因為，BB唔係機械人。
唔係你砌咗條方程式出嚟，就一定可以瞓得好。
所以，如果有睡眠顧問畀個時間表你，叫你無論如何都要跟到足，你應該懷疑呢位所謂嘅睡眠顧問係咪真係有心去幫你。
甚至，佢其實係咪對嬰幼兒睡眠有深入認識...
一個真正瞭解嬰幼兒睡眠嘅顧問，應該會識得因應BB嘅情況，去提供一個能夠同時配合BB同大人嘅時間表（二寶家庭更加需要特別編排個人化時間表）。
然後，亦會一直跟進，話你知點樣再去做微調，同埋會畀到一個有根據嘅原因，去解釋點解要咁做。
而唔係見BB瞓唔到，就盲目咁去不斷拉長清醒時間，同埋話要畀BB放多啲電，攰啲就會瞓得到
係呀，BB攰到一個點係會瞓著，但係絕對唔係健康嘅做法囉
咁嘅建議，同媽媽谷啲人叫你日頭唔好畀BB瞓，夜晚晏啲落床有乜嘢分別呢？
想BB瞓得好，必須要識得點樣去視乎情況而執生。
最好嘅做法，當然係媽咪爹哋自己去學，點樣處理唔同嘅情況。
畢竟，冇人可以24小時on call去回答你嘅問題。
而且，最瞭解你BB嘅，一定係每日湊住佢嗰個人。
（呢個係我整睡眠調整全面睇嘅原因，希望幫你成為你BB嘅睡眠專家 ）
當然，我明白喺長期睡眠不足之下，未必能夠有心力去睇書睇片自己學，而好想有人可以一步一步guide住，話你知點做。
喺Dolce Sleepers開業初期，我係每收到message都即時回覆；後來甚至會畀個excel file媽咪爹哋記低BB嘅睡眠情況。
但係，過咗幾個月之後，我爆咗煲
因為除咗睡眠顧問呢個身份之外，我亦係一位孖仔媽媽，所以時間其實好有限...
而且，面對每日inbox我嘅requests，我亦應接不暇，所以Dolce Sleepers經歷過兩次大改革，而我亦將重心放喺推廣健康睡眠 上，希望以唔同嘅形式（網上課程、zoom class、單次電話諮詢），幫到多啲家庭
自然，我能夠提供一對一跟進支援嘅家庭數目，變得非常有限...（不過想搵我傾，仍然可以約做單次電話諮詢㗎 ）
但你知道嗎？其實而家喺香港活躍嘅睡眠顧問，已經有7位嘞！
當然，佢哋每一位嘅做法，都會有所不同。
所以，搵到一位有心又啱key嘅顧問，至能夠事半功倍
對於希望搵一位能夠提供貼身支援嘅睡眠顧問，我有以下建議：
1) 有列明認證資格嘅頒發機構
嬰幼兒睡眠顧問呢行，暫時嚟講係冇管制嘅，所以任何人都可以話自己係顧問。而要畢到業拎張證書，其實難度亦好低。之不過，有列明認證機構，應該對嬰幼兒睡眠都有基本認識。但要注意一點，就係讀咗書，都唔代表識得運用啲知識。
2) 過往經驗
要令BB瞓得好，雖然大部份顧問都有一致嘅方向（避免疲勞過度，營造好安睡環境等），但要真正解決到BB嘅睡眠問題，其實喺執行上都有好多種方法。係咪能夠視乎每個BB及家庭嘅獨特性，去作出相應嘅建議，就好睇顧問本身有冇足夠嘅經驗，判斷到睡眠問題嘅真正原因，並且會同你深入細致去講解每一步嘅做法，而唔係只識得人人都畀同一樣嘅「建議」。
3) 願意去尋根究底
嬰幼兒睡眠喺香港仍然好新，所以如果你搵本地顧問，經驗方面一定冇外國顧問咁豐富。只不過，冇做過唔代表唔識做，最重要係願意認真對待每一個case，肯去尋根究底。而且，要累積經驗，唔係只能夠靠接case。例如，我喺讀個顧問課程之前，已經加入咗好幾個外國嘅睡眠及育兒群組，刨咗2年文，所以而家同媽咪傾電話時，好多情況就算自己冇經歷過都已經有聽聞過，亦都儲儲埋埋好多貼士，隨時可以派上用場。
4) 個人化計劃書
點知道個顧問有幾認真去對待每個case呢？你可以問吓，佢會唔會為你編寫一份個人化睡眠計劃書，一或只係你問佢就答，冇全面去審視你同BB嘅情況，提供一套完整嘅睡眠計劃。仲有就係，出咗計劃書後，仲會唔會繼續做調整，提供進一步建議，一或淨係猛叫你跟個時間表，甚至用盡所有方法令BB入睡去跟足時間表。
5) 同時接咗幾多個case
呢點應該好易明 -- 如果個顧問同時要處理好多個case嘅話，自然分配唔到咁多時間畀每一個家庭，成效亦會受影響。呢點亦係我整網上課程嘅原因，因為我知道自己每個月最多可以接幾多個case，至能夠確保提供到足夠嘅支援，又唔會令自己太吃力。所以，如果你需要貼身支援，可以考慮搵新入行嘅睡眠顧問，佢哋未必同時要處理好多個case，自然能夠畀到更多時間你，亦應該會更有心機去跟貼啲。
6) 幫你管理期望 / 唔會誇下海口
如果個顧問同你講，只要做睡眠訓練就能解決一切問題，甚至話一定要做睡眠訓練至得，咁我會建議你諗諗先... 睡眠訓練並非萬能，BB識自行入睡亦不代表唔會夜醒大喊。單單睇入睡方式，並唔足夠。而且，進行訓練時可能會出現點樣嘅情況，作為顧問亦有責任預先同客戶做好心理準備（我有份免費小冊子，歡迎去網站下載 ）。
7) 育兒觀 / 性格
絕大部份睡眠顧問自己本身都係一位媽媽，自然有佢自己一套做法及育兒觀。你可以留意吓佢哋嘅專頁，特別係當佢講有關睡眠訓練，以及睡眠以外嘅其他話題時，你覺得啱唔啱聽呢？例如有媽咪同我講，一般坊間所用嘅睡眠訓練方式，佢覺得都冇顧及到BB嘅情緒及需要，直至搵到Dolce Sleepers，即刻叮一聲通晒！
8 ) 價錢冇關係
BB瞓得好，全家都會有翻天覆地嘅轉變。所以，無論係幾百定幾千，其實都抵到爛 而且，睡眠顧問呢行仍然好新，其實未有一個真正嘅行價。平唔代表差，貴唔代表好。所以，可以睇返你自己能夠負擔到嘅費用作為決定因素之一。
9) 口裨
最後，當然都要留意推薦文嘅內容。除咗成果之外，過程中所面對嘅問題及掙扎，仲有所得到嘅支援，同埋對顧問所用到嘅形容詞，都可以畀到一個大概嘅印象你。
☆☆☆
嬰幼兒睡眠顧問 Catherine
全港首位本地嬰幼兒睡眠顧問 ‧ RIE育兒法專業課程畢業生 ‧ 孖仔媽媽
網上課程 / 電話諮詢 / 免費資源分享
