有關設限嘅問題
上星期，連續講咗好多日有關設限嘅問題。
好多人會認為，設限只係為咗制止小朋友攪攪震，所以要板起塊面好惡咁話佢至得
但呢個心態，實際上只係用恐嚇嘅方式，希望小朋友會聽話。
喺咁樣嘅環境下長大嘅小朋友，只會學識唔好行差踏錯，唔好激嬲其他人...
但佢唔會學識背後嘅道理，亦唔會擁有獨立思想；做乜嘢都被制止，亦會對身邊事物失去好奇心，少做少錯，唔做唔錯
而唔受呢套嘅小朋友，就會越嚟越反抗（或大人所講嘅反叛），會駁咀，更加唔肯聽人講，親子關係亦好難會好緊密...
其實，所謂嘅「設限」，並唔應該係咁。
而且，需要設限嘅情況，亦遠遠超過試圖控制小朋友行為呢個目的。
單單從睡眠上嚟講，如果BB而家嘅睡眠習慣，令到大人冇覺好瞓...
例如：
同床瞓碌嚟碌去整醒所有人
一定要拖住手入睡，半夜都要拖住
半夜醒咗一定要食夜奶等等...
咁呢個亦係你需要設限嘅時候。
睡眠係一種生理需要，無論係大人定BB，無論係全職媽媽定在職媽媽，都有權瞓得好。
RIE育兒法教我哋要尊重BB，但其實同樣建議畀BB知道我哋都有個人需要，需要獲得尊重。
Personal boundary係必須要緊守嘅，否則好易失去自我...
小事如人有三急可以隨時離開辦事不受打擾
或者好好坐低食餐飯唔駛追住小朋友餵飯
仲有睡前故事只睇一本書
同埋心情唔好時唔想陪玩只想攤吓梳化
唔想湊仔湊到情緒低落，就要趁早搵出你唔可能長期持續落去嘅情況，然後下定決心作出改變
小朋友亦會從你身上學習到點樣為自己set boundary，保護自己。
你好想改變而家邊個情況呢？
☆☆☆
嬰幼兒睡眠顧問 Catherine
全港首位本地嬰幼兒睡眠顧問 ‧ RIE育兒法專業課程畢業生 ‧ 孖仔媽媽
網上課程 / 電話諮詢 / 免費資源分享
