孖仔A其實係高敏兒
7年前,好似未興 高敏兒 呢個term。
一打二嘅生活,好大部分用嚟搵平衡
孖仔A同孖仔F雖然係同卵雙胞胎,但一出世已經有好大分別,重量都相差500g。
孖仔F份人比較layback,餵奶加固都好輕鬆,畀幾多食幾多。
但孖仔A就完全唔同...
細個食奶,唔食就死夾埋口唇,點迫都唔會再食,每次食幾多亦冇定(不過全日總奶量又差唔多)。
我頭一年係半泵+半配方奶,仲要係早產嬰專用水奶,貴好多
唔想浪費嘅情況下,於是搵出先餵孖仔A,食淨再加返啲奶入同一個樽餵孖仔F嘅做法(被迫食口水尾 )
之後開始加固,孖仔F好樂意食嗰啲好難食嘅盒裝沖粉米糊(意大利冇粥仔,興整蔬菜湯沖粉)
但孖仔A又係完全唔肯食,最後發現原來佢只肯食真嘅食物,壓爛隻蕉畀佢,或者煲蔬菜粥加芝士都食得津津有味。
到畀手指食物,諗住整定一大袋唔同款嘅肉餅蔬菜餅放冰格啦...
點知孖仔A只肯食新鮮整嘅食物,冰過有雪藏味又唔食
到咗而家,都仲經常投訴用洗碗機洗完嘅杯有陣味...
仲有睡褲褲腳唔可以太短,張被要冚住成張床唔可以亂咗(好彩只係熄燈前)
而情緒上,孖仔A亦係激烈人士,好容易情緒爆發。
細個時,孖仔F身上間唔時就會出現牙印,我亦試過要鉗住孖仔A阻止佢追打F...
而家7歲,孖仔A叫我嘅時候,仍然會用慘叫嘅聲音,雖然其實佢情緒平靜,只係因好小嘅事而要搵我幫手...
雖然係咁,當 高敏兒 呢個term出現嘅時候,我都冇諗過原來孖仔A好可能係其中一份子。
因為, 喺 RIE育兒法 潛移默化下,我對於孖仔A嘅情況,其實一向抱住好奇嘅心態...
我會嘗試瞭解有啲乜嘢會觸動到佢嘅情緒,已經學識點樣做至能夠令佢安心,同埋情緒風暴時點樣處理最好。
而喺睡眠上,孖仔A除咗好細嗰時因為silence reflux嘅關係,而夜晚瞓覺成日扭嚟扭去,同發出唔係太舒服啲嘅聲音之外...
(呢個情況當佢3個月時,學識自己翻身趴喺度瞓,就完全解決咗 )
其實孖仔兩個都喺4個月大時,就已經喺只需要一次dream feed下一覺瞓天光,夜晚6點瞓到第二朝6點。
6個月停埋dream feed,之後10個月開始唔駛陪睡(冇做睡眠訓練,呢個又係另一個故事,應該冇寫過 有興趣知嘅舉手啦)
一直以嚟,到而家7歲都算瞓得好唔錯。
當然中間試過出現倒退期,同drop nap時半夜不斷醒嘅情況,不過都係幾個星期就解決咗。
所以,孖仔A係咪高敏兒,其實對我嚟講並不重要。
因為 RIE育兒法 「observe more, do less, enjoy more」嘅理念,無形中已經教識咗我點樣面對孖仔A嘅高敏、激烈、不規律等等特質。
於是,當我後來睇 “Raising Your Spirited Child: A Guide for Parents Whose Child Is More Intense, Sensitive, Perceptive, Persistent, and Energetic” 呢本書時,發現好多建議其實都係 RIE育兒法 嘅建議,冇乜學到嘢添
不過,如果你小朋友有啲似孖仔A,但令你好頭痛唔知點處理,尤其喺睡眠上經常有好大掙扎,唔知小朋友幾時至可以好好入睡,唔再半夜不斷爆喊搵人的話...
就唔好錯過嚟緊星期三晚嘅網上講座「性情與睡眠:高敏孩子的睡眠調整訣竅」
到時我會同大家分享:
- 高敏孩子的9項性格特質
- 各項性格特質對睡眠的影響
- 運用RIE育兒法令高敏孩子安心入睡
一理通百理明,瞭解你小朋友嘅特質,識得點樣處理唔同情況,自然能夠更有信心處理好其他生活難題。
何況,小朋友瞓得好,心情自然靚啲合作啲
攪掂睡眠,好多育兒挑戰都可以輕鬆過關啦~