係咪奶睡，其實係由媽媽你決定㗎

今日懶得打字，得到呢位媽咪嘅同意，我直接分享佢喺 睡眠調整全面睇 學員專屬群組嘅求助messages同事後分享（我edit咗少少方便大家睇）

Mi媽媽：

6mBB全天候要埋身奶睡，一般全日睡眠時數10-12hrs（按：一般建議14-15小時）

Bedtime 1930 夜醒2-3次，要埋身至少半個鐘先訓得返，0700自然醒。

日頭明明攰到發曬忟憎都nap唔到，5-6個鐘都唔訓係基本款 -- 中間就算埋身食到訓著，都係得一半機會，可以等佢熟睡放床訓到個超過45分鐘嘅nap…

BB到而家作息仲係一遍混亂… 所以我開始諗係咪要試下奶睡之後抱住佢訓，等我哋起碼有一個(或者兩個)穩定nap time…

大家認為我呢個概念啱唔啱? 定係可以有其他理想尐嘅做法?

（群組幾位媽咪提出調整建議）

Mi媽媽 update：

我4日前開始嘗試調整，未有好嘅進展，可能加強安撫想佢訓到，真係唔work。

BB每一覺都要先埋身食奶先有機會訓得著。佢朝早一起身要食早餐，最極限2h之後再餵。次次要啜成40~50分鐘先奶睡到。基於咁棘手嘅流程 Nap 1無辦法趕喺wake window內開始...

頭3日訓到兩個nap，nap 1訓45-60分鐘, nap 2個半鐘。今日訓唔到nap 2, 又變返stay up 7.5h之後直接bedtime。

（大家繼續討論，然後再過幾日... ）

我BB訓到3個nap喇！多謝大家俾咁多有用嘅意見俾我。

可能之前太耐無覺好瞓，死剩返一粒腦細胞，我一直認定BB要奶睡先肯訓...

到Catherine話我拖到BB攰得滯，所以先搞到佢爆喊，我先臨急抱佛腳去上戒奶睡果個zoom class。

第二朝其實我都仲係覺得會搞唔掂，不過硬住頭皮跟建議時間抱住佢瞓。

BB最初都係喊，不過到清醒時間完結嘅時候，佢轉一轉個頭突然收聲瞓著咗。

就係咁nap 1訓個半鐘, nap 2訓30分鐘, catnap訓45分鐘。

今日係第5日維持到差唔多嘅作息。

（分享完畢，繼續碌落去睇結案陳詞）

其實，好多時需要奶睡嘅係媽咪，因為唔知仲可以點樣安撫BB，或者覺得BB唔啜住就瞓唔到，於是唔敢嘗試其他做法...

只有改變我哋自己嘅心態，至會見到情況出現轉變。

繼續努力，調整好作息時間，抱睡的話nap 2短可以醒咗再抱返佢瞓㗎。

P.S. 奶睡係一個個人選擇，如果媽咪唔介意半夜餵奶，而且一樣瞓得好，咁未必一定要戒。但如果媽咪因為BB一晚幾次夜奶而冇覺好瞓，死撐落去並非解決方法... 戒奶睡不等如戒埋身，親餵嘅BB一樣可以有覺好瞓㗎！

唔想錯過正向睡眠及教養文章分享，立即加入whatsapp群組啦！