小朋友被裝修聲嚇到爆喊, 點樣一招安撫成功？
有位媽咪message我，話佢2歲4個月嘅囡囡怕咗屋企樓上嘅裝修聲，一有少少聲就爆喊，又要捉住媽咪唔肯瞓覺...
更慘嘅係，半夜突然開始夜醒爆喊幾個鐘，晏覺亦都瞓唔到。成家人冇覺好瞓，攰到癲，唔知點算好
於是我分享咗 RIE育兒法 嘅文章*畀呢位媽咪，並且同佢講：
去到呢個年紀，心理因素嘅影響越嚟越大。佢話驚，你哋點樣回應呢？呢點非常重要呀，如果淨係叫佢唔駛驚，你會陪住佢，但冇 acknowledge佢嘅恐懼，係幫唔到佢克服恐懼㗎！
*文章 “It’s Okay to be Scared – 5 Steps for Easing Bedtime Fears”
過咗幾日，我就收到以下message
Meii媽媽：
Catherine，我想好多謝你分享既文章呀!
Bb不斷訓覺爆喊，我決定嘗試好冷靜咁抱住Bb等佢喊完...
瘋狂完，之後問佢其實係咪好驚?
佢話係，聽到聲音好大聲，好驚
但之後佢話都 因為我發脾氣鬧佢而好驚，佢話 she’s scared because mummy’s angry 所以就好想人抱抱同拖住...
跟住我就道歉，慢慢解釋裝修既原因同點解我會嬲。
同佢講 其實我都好驚啲聲，我都好唔鍾意。
但係都要上床訓覺，所以我會用攬住訓覺既公仔遮住耳仔，叫佢如果唔想聽到聲，都可以試下用公仔用手遮住耳仔，覺得唔驚就拎開。
之後我地擁抱左一陣， 我話答應佢會好好控制情緒，好對唔住令到佢驚，叫佢原諒我。
佢話ok，之後就good night kiss。
然後上床佢就用公仔遮住咗耳仔，突然所有嘢回覆正常，無再醒無再喊，一覺訓到天光 ，第日仲心情勁靚 好感動！
今日耳仔都唔使遮，上床好快就訓咗！
我勁內疚發脾氣令到佢驚…
你分享既文章簡直係心靈雞湯，媽媽急救寶典。得閒就要重溫下，真係萬試萬靈，超級多謝你!
雖然呢個專頁本來只係分享睡眠資訊，但每次我收到媽咪同我講，佢哋睇到專頁嘅文章，從而解決到其他育兒上嘅問題，我都特別開心㗎囉!
如果你都有故事想同其他媽咪分享，好歡迎你PM我㗎!
