BB可以用香薰油嗎？

瞓覺，係需要放鬆嘅。

有好多產品，都聲稱能夠起到鎮靜及放鬆作用，幫助入睡。

其中好常見嘅一種係 - 香薰油。

的確，對大人嚟講，香薰油係幾有效嘅產品。

不過，BB可以用嗎？

BB由於皮膚薄，生理系統亦未發育完善，所以會比大人吸收更多精油，對精油出現過敏反應嘅機會亦高好多。精油亦會影響呼吸道，引發咳嗽及呼吸困難，發燒等症狀。

尤其是好常見，聲稱能令BB安睡嘅薰衣草精油，當中嘅化學成份其實會破壞皮膚細胞，亦有研究指出，可能會令2歲以下嘅嬰幼兒出現呼吸困難，甚至導致乳房早熟症。

所以，精油對BB可以係好危險嘅事，一定唔可以直接以未稀釋嘅精油搽落BB身上。

另外，好多產品聲稱係精油，但其實只係人工製造嘅香薰，所以使用前必須瞭解產品嘅成份、來源地、榨取方式等。

而就算係聲稱全天然嘅精油，亦唔代表唔會有副作用。而且，亦絕對不能取代處方藥物。

以下列出幾點必須要知道嘅事項：

- 未滿6個月嘅BB，絕對唔能夠用擴香或任何令精油揮發嘅方式。就算係大個啲嘅小朋友，亦唔能夠使用超過30分鐘（唔可以日日用，亦唔係隻隻都用得），避免造成精油中毒

- 唔好用未經稀釋嘅高濃度精油，直接揸落任何年齡嘅BB/小朋友身上

- 唔好喺浴盆加精油，因為水同油不能融合，所以高濃度精油可能會灼傷BB嘅皮膚

- 未滿30個月嘅小朋友，一定唔可以用薄荷精油，否則有可能令孩子停止呼吸。

- 一定唔能夠將精油落喺食物或飲品，就算寫住可食用

其實，現時並冇足夠嘅研究數據，證明精油對BB真係有安睡嘅效用。

頂多可以講嘅係，如果精油對大人有放鬆作用，咁大人嘅平靜情緒對穩定BB情緒就會有幫助，令BB更容易入睡（係，BB大喊瞓唔到，其中一個主要原因係大人哄睡時嘅心態及情緒 ）。

但最安全嘅做法，都係2歲前唔畀BB接觸或曝露喺有精油嘅空間，咁就唔駛擔心啦！

希望囝囝囡囡能夠放鬆入睡，其實有好多其他方法。

一套平靜愉快，可預測嘅睡前儀式，係最安全亦係最有效嘅方式，令BB放鬆落嚟準備入睡。