幾時可以用枕頭呢?
「應該幾時畀BB用枕頭呢？BB枕頭係咪可以預防扁頭症？」
BB並唔需要用枕頭，因為...
1) BB出世時脊椎係直嘅，未有弧度，所以攤平瞓喺度並唔會覺得唔舒服
2) BB出世時頭型本身已經係圓嘅，所以仰睡時個頭會自然向左右兩邊，唔會令後腦變扁
3) BB瞓覺時唔會持續喺同一個位置，一定會郁甚至碌嚟碌去，所以頭部唔會固定喺枕頭上
4) 就算係嗰啲有個凹位嘅枕頭，都唔能夠確保BB個頭唔會移位，萬一BB個頭轉向一邊，口鼻就會貼住枕頭，增加窒息風險
5) 枕頭移位，有可能會遮蓋住BB口鼻，增加窒息風險
6) 如果BB識翻身，面向下時，甚至可能因為枕頭凹陷嘅設計令BB郁唔到，增加窒息風險
7) 當BB大個啲，可能會將枕頭丟出床外，然後大喊要你拎返畀佢，然後佢又再丟過，以拖延就寢時間
咁幾時至需要用呢？
喺2歲前都唔需要，而如果BB係瞓緊嬰兒床嘅話，亦唔應該用（一般建議3歲後至轉小童床，我囝囝都係3歲幾至開始用枕頭）
其實，瞓得舒唔舒服，小朋友係知嘅，所以我唔會話幾多歲就需要用枕頭。從RIE育兒法嘅角度，我會睇返小朋友嘅情況去決定：小朋友有冇要求用呢？或者見佢會用手或公仔墊喺頭下面呢？
另外，2歲後用枕頭必須係幼兒枕頭，好薄身嗰種。之後大個啲都係睇小朋友需要，孖仔兩個身型唔同，所以枕頭一個厚啲一個薄啲。
但唔用枕頭，好驚會有扁頭症喎？
其實，畀BB仰睡並唔會導致扁頭症。
頭先都講過，BB瞓覺會會郁嚟郁去，唔係咁多個鐘都維持住同一個姿勢（除非係有斜頸症，但呢個情況更加唔應該用枕頭）
所以，瞓覺時唔需要用枕頭，更加唔應該用任何產品去試圖固定住BB嘅睡姿（用手都唔好，否則BB習慣咗，夜醒自己郁唔返去個睡姿，自然又會大喊求救 ）
要避免扁頭症，你只需要喺BB清醒嘅時候，多啲畀佢喺地下自由活動，或者放返喺BB床都可以。頭部活動冇受阻，自然就可以自己擰嚟擰去，個頭至會又圓又靚啦！
千祈唔好長期放BB喺躺椅呢類會限制BB活動能力嘅產品呀！更加唔好日頭畀BB喺躺椅瞓覺（危險+養成習慣，呢點遲啲另外寫篇文講）
BB被長期放喺躺椅或搖搖椅上，除咗會影響肢體活動發展之外，正正因為BB個頭唔能夠完全自由郁動，所以至會導致扁頭症。
美國兒科醫學會嘅指引係，每日最多只能夠畀BB喺躺椅或搖搖椅一類產品上瞓30分鐘㗎咋！唔需要用就更好添啦，可以慳返啲錢，又佔少啲位
涉及睡眠安全，同埋BB嘅健康發展，唔好用枕頭呢點非常重要，請大家幫手share呢篇文啦！
伸延閱讀：
