呢幾個BB似乎瞓得好甜，但其實好危險

BB瞓得唔好，大人自然都冇覺好瞓，加上BB日夜爆喊，就更加崩潰

咁嘅情況下，自然好想搵個快手嘅方法，令BB瞓得到，瞓得「好」。

除咗之前幾日所提到，「聲稱」能協助BB入睡嘅產品之外，坊間仲流傳好多方法，例如...

- 放米袋喺BB心口/身體兩側
- 用枕頭或攬枕圍住BB
- 畀媽咪件衫BB攬住瞓*

以上其實都係好危險嘅做法，尤其係啱啱出世幾個月，未有太大活動能力嘅BB，塊面被冚住真係會好危險㗎

今日同大家重溫由美國兒科醫學會（AAP）所發出嘅安全睡眠指引，適用於1歲以下嘅BB。

希望大家可以幫手share，令多啲媽咪爹哋對安全睡眠有多啲醒覺，唔好繼續抱住「個個都係咁，邊會有事吖！」嘅心態，避免悲劇再次發生

*唔可以放媽咪件衫喺BB床，但可以掉返轉，媽咪自己攬住BB張床單瞓，之後放返喺BB床褥上，有同樣效果（頭盔：但唔代表一定會work㗎 ）

伸延閱讀：《10種令BB瞓得舒服安全嘅安睡產品》

☆☆☆

第一點係，無論日夜，都必須將BB以背脊向下嘅姿勢放落床。但如果BB已經可以輕易咁翻身，就唔需要將佢翻返過嚟仰睡，而可以「由得佢」趴睡。「由得佢」嘅意思，即係唔鼓勵，但亦唔需要反對。因為趴睡絕對唔係乜嘢「技能」，需要「解鎖」。就算BB趴睡，亦唔代表佢會瞓得好，可以一覺瞓到天光。所以，如果BB翻身後大喊，你係必須幫佢，唔可以由得佢大喊唔理！

更重要嘅一點係，BB嘅睡眠範圍，必須要清空，尤其是BB會趴睡嘅話， 一定唔可以有任何軟身物品，例如枕頭、棉被、公仔（1歲後可以有隻細公仔）、攬枕、哺乳枕、分隔床、以及縛喺床邊，聲稱能夠「保護」BB嘅床圍。軟身物品除咗可能會遮到口鼻影響呼吸外，亦可能會引致二氧化碳中毒！床圍條繩有機會會纏住BB條頸，而就算係聲稱能透氣嘅網狀床圍，一樣危險。驚BB夜晚凍親，或者手腳被床欄kick住嘅話，可以用睡袋㗎，而且仲有其他好處添！

好多人唔知道嘅一點，就係BB必須要瞓喺一張平坦、堅硬嘅床褥上。要有幾硬？ BB瞓落去唔會下陷就可以嘞，否則趴睡時面向下嘅話，BB就會無辦法呼吸。而且，張床單亦必須要緊緊包住張床褥至得，唔可以太大張突晒出嚟。

千祈唔好將BB放喺梳化上瞓覺，如果BB喺躺椅、搖搖椅、可傾斜式餐椅、汽車座椅、BB車（有可平躺嘅嬰兒籃除外），或孭帶上瞓著咗，應該儘快將BB轉移返去平坦嘅地方繼續瞓覺。好難？BB會即刻醒？咁就應該直接畀BB喺床上入睡嘞，除咗安全外，BB亦能瞓得好啲，唔會一開眼唔知自己喺邊而嚇醒！

伸延閱讀： 《要抱至肯瞓，係咪寵壞咗？》

最安全嘅做法，係最少頭6個月，大人同BB同房不同床，甚至去到1歲。AAP唔建議母子同床，因為無論你幾小心，都仍然存在一定風險。喺以下幾個情況下，會更加危險：

- 4個月以下初生嬰兒
- 早產嬰或出生即體重過輕嘅BB
- 父母或其他同床者係吸煙人士（就算唔會在床上煲煙）
- 媽媽喺懷孕時有食煙嘅習慣（就算之後戒咗）
- 就寢前服食過會令人昏昏欲睡嘅藥物（攰得滯可能會瞓到不醒人事嘅話，其實一樣危險）
- 飲咗酒
- 同BB一齊瞓嗰個唔係BB嘅父母，例如係工人姐姐
- 瞓覺張床太軟，例如舊床褥，或梳化等
- 床上有軟身物品

包巾有助初生BB瞓得好啲，但當BB開始出現想翻身嘅跡象，就必須停止，畀他雙手能夠自由活動。

奶咀有助減低發生嬰兒猝死症嘅風險，但亦無須強迫BB使用。

另外，市面有好多聲稱能夠令BB瞓得服啲嘅產品，例如初生眼嬰兒睡窩、或防翻身枕等，唔單止可能會造成危險，亦會令BB形成習慣，放返BB床會瞓唔到，而且亦會減低夜醒時，BB能夠自己瞓得返嘅機會，所以都唔建議用啦！

最後提返一句，睡眠訓練應該等BB滿6個月後至開始，而且完全唔需要留低個BB喺房由佢喊到瞓著嘅！想BB學識自行入睡，方法有好多，你絕對可以留喺BB身邊安撫佢，cry it out (CIO) 已經過時㗎嘞！

P.S. 其實BB唔駛識得自行入睡，都一樣可以一覺瞓天光㗎！