防止孩子踢被的方法
香港嘅冬天雖然唔係好凍，但當BB瞓覺時，體溫會因活動度大減而下降。
好多家長都會因為BB經常踢被而苦惱，無法安心瞓覺。
可以點呢？
方法好簡單 - 用睡袋就得啦！
使用睡袋嘅好處：
1. 睡袋就等如一張可著上身嘅棉被，無論BB翻幾多次身、坐起或站起，都無須再次整理
2. 睡袋能夠成為一種睡眠關聯，當你為BB著上睡袋，佢就會知道係時候瞓覺嘞
3. 睡袋能防止BB隻腳被卡喺嬰兒床欄之間（床圍並非安全嘅產品，切勿使用）
4. 睡袋唔會蓋住BB頭部，或纏住條頸，減低發生嬰兒猝死症嘅風險
5. 睡袋能減低BB嘅靈活度，延遲BB爬出嬰兒床嘅時間（記得床內應該清空所有物品，以免發生危險）
幾時可以開始使用睡袋？
當BB出現開始翻身嘅跡象，就應該停止用包巾（swaddle）而轉用睡袋，最安全嘅建議為出生後8星期。
點樣選購合適嘅睡袋呢？
- 尺寸適中：BB頭部唔會退入睡袋內，長度則不成問題
- 厚薄適中：市面上有唔同物料製造嘅睡袋，厚薄度以tog為量度單位，由0.5tog-3.5tog都有，適合一年四季唔同氣候所需
- 配合年齡需要：有些初生BB因為喺媽媽肚內時，習慣將雙手舉高放在頭部兩邊，所以用包巾將雙手壓下反而會瞓得唔好，市面上有特別設計嘅睡袋，能夠畀BB保持雙手向上嘅睡姿；當BB開始想翻身，為安全起見必須停用包住BB雙手，呢個時候可以轉用一種星型睡袋Zipadee-Zip，BB雙手能自由活動，但仍然有包裹效用；而當BB年紀漸大，對於無法睇到自己雙腳可能會出現抗拒嘅情況，呢個時候你就可以轉用開褲腳睡袋（見圖）
*買邊隻牌子嘅睡袋好? 孖仔媽媽網站有推介!
圖片來源：Love to Dream及 Slumbersac官網
