BB成日肚餓喊醒，點算？

「BB而家得個半月大，飲奶未有pattern，我哋都係等佢叫喊或者見到伸脷就餵，而半夜就比較多係佢喊到叫醒左我地，再去餵。

我哋有時見佢喊得好厲害要飲奶，就會餵完先換片，飲完奶掃完風佢已經好眼訓，但換片就令佢醒返，要再訓返唔係次次唱歌、拍pat都哄到，最後係會要啜奶奶。咁樣處理好嗎？定係由佢喊換完片先餵？但感覺又好似漠視佢既感受同需要咁…」

我會睇吓可唔可以喺佢喊肚餓前就換片先，就算唔係咁滿都換定先，咁就唔駛等瞓前至換，避免咗呢個問題。

喺BB出世後頭幾個月，每次餵奶應該相隔2.5-3小時*左右，至能夠確保佢每次都係full feed，而唔會食少少見唔餓就瞓咗，跟住好快又再餓醒，結果次次都瞓唔得耐。

好多時母乳媽媽會demand feed，呢個方法喺BB啱啱出世時，的確可以增加奶量。

但過咗差唔多兩個月，奶量已經穩定，BB夜晚能夠瞓得長啲，對佢嘅發展非常重要。

而且，BB喊唔一定係肚餓，每次喊都餵奶，有可能會忽視咗佢真正嘅需要。

雖然餵完奶佢得到安撫會暫時唔再喊，但問題冇解決到，佢始終都係會再醒再喊過。

*當BB嘅體重增長回出世時體重，夜晚就可以唔需要計時，等BB醒咗至餵奶，咁就可以由BB作主導，慢慢延長每次夜奶嘅距離嘞