奶嘴… 用？不用？
應唔應該畀BB用奶嘴，係一直令眾多家長爭持不休嘅問題（之一）。
要作出最合適BB嘅選擇，就要先瞭解使用奶嘴嘅利與弊。
好處：
• 有助減低發生嬰兒猝死症（SIDS）嘅風險
• 滿足BB需要吸啜嘅慾望
• 有助BB平靜落嚟，幫助入睡
壞處：
• 可能令初生嬰兒將乳頭及奶嘴混淆，無法正確吸吮母乳
• 提高感染中耳炎嘅機會
• 令BB對奶嘴產生依賴，冇奶咀就無法安睡
• 每日長期使用，會影響上下頜骨嘅發育，並導致上下牙齒咬合不正
咁到底應該用定唔用好呢？
呢個實在係家長嘅個人選擇，但有一點要注意嘅係，千祈唔好濫用奶嘴，每當BB喊嘅時候就將奶嘴塞入BB口度。
聽到BB喊，我哋往往希望能夠立即安撫BB，用盡任何方式止住BB嘅淚水（例如扮鬼臉、唱歌跳舞、畀玩具等）。
在照顧初生BB時，奶嘴往往係最輕鬆同有效嘅方法，令BB立即安靜落嚟。
但係，初生BB年紀仲細，無法清楚表達自己，只好通過哭泣同我哋溝通，表達自己嘅需求及情緒。
BB一哭，我哋就塞奶嘴，會阻止咗同BB作進一步溝通嘅機會，亦無法搵出BB喊嘅真正原因。
如果唔打算用奶嘴，咁點樣能令BB學識自我安撫呢？
BB嘅手指，係最方便嘅安撫物。
手指永遠唔會遺失，唔會喺BB熟睡時跌咗，而且何時何地都可以「拎」來用。
最重要嘅係，手指是屬於BB自己嘅，佢會自己發現呢十隻手指，學識點樣去用，並且能自行決定何時需要用 – BB擁有完全嘅控制權。
有家長會擔心，要戒奶嘴掉咗佢就得，戒手指會難好多喎...
我哋可以咁樣諗，當BB漸漸長大，雙手掛住用嚟玩，自然就唔得閒啜啦！
喺考慮過利與弊後，如果你決定要畀奶嘴BB，就必須注意各項安全守則，以及幾時需要同BB戒奶嘴嘞！
