媽咪分享：用咗一日，就唔洗再半夜執奶咀
前日，一時感觸寫咗篇千字文，好多謝大家幫手分享出去，希望多啲媽咪爹哋知道真正嘅健康睡眠、真正嘅 相信BB 同 尊重BB 係點嘅一回事。
出咗篇文之後，收到幾位媽咪同我訴苦，佢哋都曾經面對同一處境 --
喺房外聽住BB喊覺得好辛苦，諗住忍幾日就會變好，點知喊咗好多日都仍然唔能夠令BB一覺瞓到天光...
錢駛咗，大人同BB仍然冇覺好瞓，覺得好無助...
唔係話唔應該做睡眠訓練，我係好贊成以睡眠（反）訓練嘅方式，令BB重新擁有自行入睡呢種天生嘅能力。
係㗎！
瞓覺其實係一種生理需要，唔駛教嘅。
我哋要做嘅係唔好阻住BB瞓覺，同埋拎走所有會騷擾到BB，阻止佢哋自然入睡嘅障礙。
當BB習慣喺床上入睡，自然就唔需要做睡眠訓練都可以瞓得好
為咗做到呢一點，好多媽咪會選擇塞奶咀，希望能夠令BB啜住啜住就瞓著（仲有更重要嘅係唔駛聽到喊聲 ）
奶咀可以係一種好有用嘅安撫工具，work嘅話係ok嘅（但有心理準備喺BB識得自己執前要做奶咀專員）。
但如果BB不斷吐返出嚟，就無謂勉強塞入去嘞！
有個4個月大BB嘅Yoyo媽媽，之前問過我有關翻身同奶咀問題，啱啱就同我分享返：
「我聽取咗你嘅意見，無再俾奶咀，同埋放手俾佢揾自己舒服嘅姿勢瞓…
結果佢用左一日，就改左用手指自我安撫，我唔洗再半夜執奶咀!
同埋俾佢係安全環境下翻身，佢依家變咗個愛趴睡的寶寶 好多謝你嘅意見 」
相信BB嘅真正出發點，唔係令佢能夠做到一件事，而係畀佢有自由去選擇點樣做，以及幾時去做到一件事。
當中嘅分別可以話好subtle，但其實亦有好大嘅分別。
RIE育兒法 創辦人Madga Gerber講過：
"All babies accomplish milestones in their own way, in their own time."
信任BB，係respectful parenting嘅基本原則。
但同時，亦必須要瞭解BB嘅身心發展，知道點樣至係真實可達到嘅期望。
就好似要求1歲嘅小朋友唔扔嘢，要求2歲小朋友坐定定成個鐘等，都係 「不真實嘅期望 」。
唔係你相信佢能夠做到，不斷去同佢講道理，就能夠令佢做得到。
呢個位，你無論點樣 「溫柔地堅持 」，都唔會work，只會令你覺得失望同氣餒...
伸延閱讀：
《奶咀... 用唔用好？》
https://blog.dolcesleepers.com/blog/dummy-1
《食手會唔會上癮好難戒？》
https://blog.dolcesleepers.com/blog/dummy-vs-hand-sucking
《有關趴睡意外的幾點補充》
