雖然BB嘅能力係比我地想像中強大......
今日又收到一個令我好心up嘅信息
令我更驚訝嘅係，呢位媽媽quote咗上一位幫佢sleep train 3個月大BB嘅睡眠顧問所講嘅說話...
係我曾經喺專頁所講過嘅信念...
但，被扭曲咗
係，我講過：
「要相信BB既能力比我哋想像更大...」
「要溫柔地堅持...」
但係，呢兩句說話，並唔能夠用喺「sleep train 3個月大BB」呢個情況...
而且，今次仲要唔係第一次，有媽咪喺搵咗另一位睡眠顧問同BB做sleep training後，再同我求救
我唔知道今次呢位，係咪同之前嘅cases係同一位顧問，如果係嘅話我好希望你會睇到呢個post...
行規係最少要等BB滿4個月，至可以做睡眠訓練（我一般建議滿6個月）
得3個月嘅BB，係唔應該，亦唔需要做睡眠訓練，只需要做睡眠調整（sleep shaping） - 即係0-5個月「健康睡眠工作坊」嘅內容。
睡眠調整嘅意思，係指用溫和嘅方式，慢慢幫BB自然地延長睡眠時數。
例如營造安睡環境、掌握好放床時間，以及制定睡前儀式，令BB做好瞓覺嘅心理準備等。
睡眠調整可以由BB出世就開始開始做，完全唔會要你將BB放低喺床，然後出房等BB喊到瞓著
BB嘅能力的確比我哋想像中強大，但喺月齡咁細嘅BB身上用咁agressive嘅做法（由得BB自己一個喺房，而且勉強要睡眠發展仍未成熟嘅BB跟時間表），係完全冇需要...
搵我求救嘅媽咪，佢哋嘅心理狀態都好差，因為要喺房外面聽住BB喊，好焦急又好擔心，仲怕會影響到BB嘅attachment...
於是，多數頂幾日就忍唔住放棄，然後逐步後退，有個case甚至個顧問最後叫佢做返奶睡 （後來呢位媽咪跟返清醒時間放床，BB就順利能夠喺床仔自己瞓。BB已經5個月都仲可以即刻改變得到，無痛入睡囉！）
今日搵我呢位媽咪，其實算係「成功」，不過去到4個月睡眠倒退期就情況惡化，而且5個月大時，BB仍然不斷夜醒瞓得好唔冧...
（其實夜醒問題一直都解決唔到，不過得3個月有夜醒正常呀，餵奶瞓返就得。睡眠顧問嘅責任，唔係淨係解決睡眠問題，仲係要畀媽咪爹哋有合理嘅期望...）
令我最心up嘅係，呢幾位媽咪其實喺訓練過程中，都覺得唔係好對路，但畀咗幾千蚊搵「專業人士」幫手，覺得應該係「啱」嘅，唯有跟住做...
更壞嘅情況係，當做唔到要求，就覺得係自己唔好，內疚自責... 同埋，會諗點解其他人做到但自己唔得... （但其實可能根本就冇你見到咁美好）
我明白，當需要每日花好多時間抱睡，然後放床即醒，呢個情況係好惡頂，我亦唔建議死撐。
但喺做睡眠訓練之前，其實有好多嘢可以做。
並非一定要喺 「冇覺好瞓」以及「睡眠訓練」之間二揀一㗎！
講到呢度，我真心好希望睇到呢度嘅你可幫幫手，share呢篇文章畀朋友，甚至share去媽媽谷，畀佢哋知道，真係唔好同得3個月大嘅BB做sleep training...
3個月大嘅BB對入睡方式未有依賴，只要掌握好時間，放床陪住佢，畀機會佢嘗試，係會可以自然喺床仔瞓著（如果爆喊好耐就抱啦，唔駛要求100%做到住）
3個月大BB嘅清醒時間係1-1.5小時，即係醒咗45-75分鐘就要開始氹佢瞓或放床。
唔需要留低BB自己一個喺房，你可以陪住佢，適度嘅安撫係ok嘅，只要唔好用盡方法去令佢入睡，結果反而過度刺激到佢就得。
只要BB自小習慣床上入睡，發生睡眠問題嘅機會就已經大減。
得幾個月嘅BB，係唔需要做到自行入睡㗎！
請大家幫我將呢個message傳出去啦，實在唔想再聽到，有媽咪畀人教話要相信3個月大嘅BB有能力爆喊完自己瞓，然後就會瞓得好
相信BB，都要BB係developmentally ready至得...
溫柔地堅持，都要所堅持嘅嘢係啱嘅至得...
唉.…
希望做睡眠調整, 幫BB自小培養良好睡眠習慣，可以報讀0-5個月「健康睡眠工作坊」
工作坊會以教學影片嘅形式，講解如何幫你囝囝囡囡打好健康睡眠基礎，自小培養良好睡眠習慣。
課程一共有6條教學影片，全長2小時，以及２段Q&A影片。另外，每個題目亦會有補充資料，助你瞭解更多。
課程內容：
- 點解BB一落床就喊
- 無須依賴奶睡抱睡搖睡嘅秘訣
- 延長夜間睡眠長度嘅方法
- 令BB瞓得安全同舒服嘅要點
- 點樣增加BB安全感
- BB大喊點算好
- 及更多...
費用：$350
