放工先有時間陪囝囝囡囡，無辦法提早就寢時間？

「我哋想有親子時間放工返黎先幫佢沖涼，返到屋企已經最早6:30，所以都要搞到成9:00先可以幫佢沖涼。如果要BB八點訓，時間上會好難配合得到...」

香港有好多雙職家長，只有放工後至有時間陪仔仔囡囡玩，所以香港小朋友嘅就寢時間喺一項全球性調查中*，係最遲嘅一群。

從健康睡眠嘅角度嚟講，日出而作日入而息，對小朋友嚟講係最好嘅，所以2歲前應該8點前就瞓，3-5歲嘅就寢時間亦唔應該超過9點。

香港家長所面對嘅嬰幼兒睡眠問題，唔多唔少就係因為就寢時間太遲，令小朋友已經攰得滯，冇辦法輕易瞓得著，亦好難可以瞓得好，結果細個時唔抱瞓唔著，去到3/4歲亦會仍然一晚醒幾次...

對於時間唔夠用呢個問題，我嘅建議係畀BB先食晚餐，等父母返嚟後即刻開始睡前儀式，放咗BB落床後父母再食飯。

無論係傳統餵食，一或blw，最好都係將專注力100%放喺小朋友身上，一來小朋友會食得好啲，二來父母自己食飯時亦可以輕鬆啲，唔駛食兩啖就要照顧個BB。

除此之外，更重要嘅係，當BB已經眼瞓但又未有得落床，情緒難免會差啲，胃口亦可能會受到影響。

畀BB食咗先，落床時佢未疲勞過度，自然容易啲瞓得著，亦能夠瞓得好啲冇咁易醒。BB早啲瞓，大人自己食飯時可以輕鬆啲之餘，亦可以有更多私人時間，甚至可以約朋友出街食飯，對大人小朋友雙方都有好處。

而且，慳返啲時間，睡前儀式就可以放鬆慢慢嚟，唔駛趕頭趕命咁，BB至可以relax落嚟準備瞓覺㗎嘛！

親子時間貴精不貴多，其實睡前儀式嘅每一個步驟，都係增進親子關係嘅好機會。 

RIE育兒法 稱之為want something quality time，由於呢類活動會有好多肢體接觸（換片同沖涼等），係好親密嘅活動，而且需要BB嘅合作至能夠完成，所以係好好嘅溝通時間嚟㗎！

當然，喺進行睡眠訓練期間，會需要長啲時間幫BB入睡，令大人嘅晚飯時候延後，不過當B學識自行入睡唔再需要你陪，你就可以放佢落床然後出房食飯。呢個絕對係可以做到嘅事嚟！

想改善BB嘅睡眠質素，夜晚一定要畀佢瞓得夠。

早啲落床其實係好容易做得到嘅一點，只要你能夠放得開，唔好執著要喺而家呢個年紀就要仔仔囡囡同大人同枱食飯。

想令BB容易啲入睡同埋瞓得好啲，並唔係咁難做得到嘅事，而且只需幾日其實已經能夠見到成效！

真係好想一齊食嘅，星期六日唔駛返工，就可以一家人一齊食飯啦！

同埋當BB大個少少，清醒時間長啲，可以遲少少瞓，到時亦可以一齊食飯，講緊都只不過係一兩年內嘅事嚟嗟！