媽咪分享：一直放唔開以為唔得嘅係我

香港小朋友普遍夜瞓，10點瞓算早，夜到11、12點都好常見

通常呢個情況，冇人想嘅...

只係小朋友唔肯瞓覺，或者成日夜醒，於是至會將就寢時間越推越遲

最後終於氹到小朋友瞓咗，大人已好攰，好多時就同小朋友一齊瞓埋...

仲想有me time? 唯有撐到半夜三更至瞓

仲有冇得救？

可以有返me time嗎？

當然可以啦！

你絕對可以令囝囝囡囡早啲瞓㗎，唔係話要即刻早到7點8點，就算提早到10點，都算係一個階段性勝利嚟㗎

只要你有決心，有方向，有計劃

記住，瞓覺冇得迫，令囝囝囡囡願意瞓覺，甚至鍾意瞓覺，至係解決睡眠問題嘅長遠方法！

睇吓Connie媽媽嘅分享啦！

「呢幾日，我細心聽下囡囡嘅反應同需要。

因為佢都大個，識識地講嘢。

佢出完大牙之後開始鍾意放手指入口，其實我對於佢食手指係冇特別反對，本身諗住咁唔奶睡，俾返第二個類似嘅嘢佢取代。

但我發現佢食好耐都唔訓，食食下仲會變左玩...

於是，我哋埋身食完奶，佢仲好清醒嘅情況下，我叫佢伏低。

佢都聽話，打側訓，痴埋我度。

咁我就乘機用手搭住佢對手，好似攬住佢，同時又阻止咗佢食手。

然後我囡都仲想講嘢同玩，我話要訓喇！

佢有少少嬲，尖叫左幾下，然後同我講：

baa baa black sheep

我就問佢：

係咪想聽媽媽唱歌？

佢答：

唱

咁以前都有試過唱歌um佢訓，佢只係有平靜啲，又唔係成日瞓到。

呢兩晚佢都有要求我唱呢首歌，我一邊攬住佢一邊唱歌。

加上用咗你講嘅app去記錄低佢瞓覺嘅時間，呢兩晚佢都係十點就訓左，重要係十幾分鐘就訓著！

我真係好開心，原來佢真係好叻！

一直放唔開以為唔得嘅係我，佢由十點訓到第二朝八點，終於唔使再搞到半夜先訓 」