開完party太興奮瞓唔到

孖仔呢幾個星期因為咳所以冇返學，冇壓力下攪到越嚟越夜瞓

琴日請大家估吓我點樣做，令佢哋能夠瞓返11個鐘。

追開 Dolce Sleepers嘅讀者媽咪都估到...

就係早啲趕佢哋上床瞓

孖仔越嚟越大，要求越嚟越多都正常，不過一般嚟講總算合作，能夠愉快入睡。

但係，連開2日party，雖然係日頭開，6點幾已經散水，但之後仲要執嘢食飯，結果孖仔比平時遲咗好多至瞓

第一晚都還好，但第二晚孖仔A明顯出現異常狀態...

瞓覺前唔畀我走，猛話有嘢要講，出咗去後又喺床細聲叫，話張被蓋唔到頸，又話條褲縮咗上去...

總之就係其實好攰但唔想瞓咁

我都炆㗎！尤其是仲有好多嘢要執，仲要清潔間屋

但我明佢自己都好辛苦，鬧佢都無補於事...

於是都係用 sportscasting 嘅方式，同埋以最悶及講最少嘢嘅方式去同理佢嘅感受，最後所有要求都滿足後*就終於肯瞓（包括將成個地球放喺佢張床度 ）

之後嗰日，我準時8點就畀佢哋上床熄燈，孖仔即刻順攤好多，兩個傾咗陣計後就瞓著，比之前兩晚早咗成個鐘瞓著，第二朝亦瞓到差唔多8點至醒

小朋友越嚟越大，爆喊嘅情況越嚟越少。

夜晚攰得滯，反而會唔願瞓，甚至好興奮咁完全冇睡意。

因為，其實同細個BB時一樣，小朋友都係會因為疲勞過度而輾轉反側...

細個時未識講嘢於是爆喊，大個啲就會因為不安而扯住媽咪，或者諗好多原因唔畀你走...

因為，有媽咪喺度，會安心啲，舒服啲

所以，當小朋友唔肯瞓覺，其實佢並非係表面睇起上嚟咁未夠攰㗎！

好可能佢反而係攰得滯，明知會輾轉反側瞓唔到，所以係要扭一輪，等壓力荷爾蒙水平下降返至瞓得到...

*因為孖仔A係攰得滯，所以瞓唔到好辛苦，而唔係測試行為，所以呢個位去設限，其實對大家都冇好處，唯一要堅守嘅底線係維持一向嘅入睡方式。

RIE育兒法喺處理好多情況上，其實都好flexible，需要視乎實際情況去決定點做㗎

☆☆☆

嬰幼兒睡眠顧問 Catherine

全港首位本地嬰幼兒睡眠顧問 ‧ RIE育兒法專業課程畢業生 ‧ 孖仔媽媽

網上課程 / 電話諮詢 / 免費資源分享

www.dolcesleepers.com