應該以BB一覺瞓天光作為目標嗎？

有媽咪問：「其實BB夜醒，是否正常事? 有冇話幾多次以上為之多，可能時間表有問題呢？父母應否以幫BB一覺瞓天光為目標呢？ 」

呢條問題問得好好。

其實，夜醒係完全正常，同埋常見嘅事。

無論係BB、小朋友定大人都會夜醒，分別在於係咪自己瞓得返/係咪記得。

有研究指出，一個人每晚其實會醒幾十次囉！

不過喺嬰奶兒睡眠嘅範疇嚟講，當BB夜醒需要大人作出協助 (包括講一句「媽咪喺度」 ) 至瞓得返，至會構成 「所謂」 嘅睡眠問題。

所以，呢位媽咪問得好好，其實我唔建議以「幫BB一覺瞓天光」為目標。

因為無論一向瞓得幾好嘅BB，都總會好間唔時夜醒爆喊嘅情況出現，咁係咪就等如失敗呢？做得唔夠好呢？

絕對唔係囉！

睡眠係最容易受各種因素影響嘅一環，冇BB會去到6歲都可以晚晚一覺瞓到天光，完全唔出現夜醒嘅情況...

問題係大人需要幾大嘅effort去處理呢個情況，係好間唔時一次，定係經常性發生。

所以，我嘅睇法係，照顧者知道點樣處理，會去諗成因再作出調整， 至係真正嘅目標。

係，個目標其實應該係大人自己身上，而唔係BB。

因為你冇可能完全控制BB嘅睡眠情況，用咁樣嘅心態去處理睡眠問題，you are setting yourself up for failure...

P.S. 當然，認識基本睡眠知識亦係非常重要嘅一步，大家可以係呢度download一份包括唔同月齡嘅睡眠需要概覧，希望幫到大家有個起步點。

☆☆☆

嬰幼兒睡眠顧問 Catherine

全港首位本地嬰幼兒睡眠顧問 ‧ RIE育兒法專業課程畢業生 ‧ 孖仔媽媽

網上課程 / 電話諮詢 / 免費資源分享

安全睡眠ABC